Novas Aristanesas, lunis 25 de onniasantu de su 2024

Una filera de dispedidas intra de maistros e amantiosos de su connotu de Sardigna – Sunt medas is maistros e is amantiosos de su connotu de sa provìntzia de Aristanis chi nos ant lassadu in custos meses. Pagas dies a oe, in Santeru, est mortu Franco Panico. Impignadu dae semper in su promovimentu de su turismu in provìntzia e amantiosu pro s’amparu e s’avaloramentu de su connotu, in is annos Otanta, paris cun una cambarada de voluntàrios, aiat torradu a abbiatzare sa currera a caddu “A sa lòriga”.

Su 16 de su mese de santugaine, imbetzes, Aristanis at saludadu a Francesco “Lillino” Cadoni, presidente de su Grèmiu de is maistros de linna in su 2013 e in su 2014. Comente a majorale en cabo aiat assignadu su rolu de cumponidore de sa Sartìllia de su martis a Valentina Uda e Emanuela Colombino. In antis de Francesco Cadoni, fiat morta Agostina Pia, viuda de Antonio Casu. Morta a primìtzios de cabudanni, tzia Tina est istada un’istitutzione pro su Giara Club; pro cussu una filera longa de cadderis chi ant frecuentadu s’iscola de ecuitatzione dda teniant comente a una mamma.

Abarrende in su mundu de sa Sartìllia, in su mese de trìulas s’est connota un’àtera pèrdida manna: est mortu, difatis, Pacifico Tratzi, maistru de tumborràrgios e trumbiteris, chi aiat ghiadu pro annos meda sa cambarada de sa Pro Loco de Aristanis. Gràtzias a issu, in su 1981, fiat nàschida s’iscola de is tumborràrgios e trumbiteris piticheddos de sa Pro Loco, sa cambarada chi acumpàngiat sa Sartilliedda.

In cabudanni etotu, Crabas at pèrdidu a unu maistru sonadore de sonos de canna: Giovanni Casu, connotu comente a Paui. Maistru reconnotu in su panorama de sa mùsica populare sarda, est istadu su primu chi nd’at pesadu un’iscola in su Sinis, in is annos Otanta, frecuentada de prus de 150 giòvanos. Cun su frade Daniele, Paui nd’aiat istantargiadu su “Duo Casu”, portende in giru peri s’Europa is sonoridades de su Sinis e de sa Sardigna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.