Novas Aristanesas, lunis 11 de onniasantu de su 2024

Novas Aristanesas, lunis 11 de onniasantu de su 2024

Sas bellesas de sa provìntzia de Aristanis arribant a Paestum – Sa provìntzia de Aristanis puru at a èssere protagonista in sa de XXVI editziones de sa Bussa Mediterrànea de su Turismu Archeològicu in Paestum. Bator dies ricas meda de propostas.

A custa manifestatzione de importu, ocannu puru, ddoe ant leadu parte museos e realidades de sa provìntzia chi ant tentu manera de fàghere a bìere su potentziale turìsticu issoro, faghende a connòschere sas etzellèntzias de sos logos, dae sa cultura enogastronòmica fintzas a su paesàgiu e a sas traditziones artesanales.

Ddoe fiat sa Fundatzione Mont’’e Prama chi a prus de àere firmadu s’atentu in subra de su tema mannu de su Parcu Archeològicu Naturale de su Sinis, faghende propostas de itineràrios e esperièntzias, at retzidu dae su diretore de sa Bussa Mediterrànea de su Turismu Archeològicu de Paestum, Ugo Picarelli, fintzas su prèmiu “Paestum – Mario Napoli”, pro su de 50 anniversàrios dae cando ant agatadu sos Gigantes.

In custa bidrera bella, de importu pro promòvere su turismu sustenìbile e avalorare su patrimòniu locale, ddoe fiat fintzas su Gal Sinis, chi at tentu manera de afortigare sa retza de sos cuntatos suos, cunfrontende-si cun espertos e operadores de su setore turìsticu.

E in fines, protagonista in Paestum est istadu fintzas su GeoMuseu Monte Arci “Stefano Incani” de Masuddas, acasagiadu in sa parada de su Parcu geomineràriu istòricu e ambientale de sa Sardigna, in ue at propostu a sos bisitadores meda una panoràmica de sos territòrios e de sos comunes de s’Ìsula in ue su patrimòniu mineràriu, geològicu e naturalìsticu est de importu mannu. Su Parcu at acasagiadu in sa parada sua non su GeoMuseu ebbia, ma fintzas su Parcu archeològicu de Nora, su Comune e su logu de Sa Marchesa de Nuxis, su Cunsòrtziu turìsticu pro s’Igresiente e su Cunsòrtziu Natura bia de Domusnoas puru.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.