Novas Aristanesas, giòbia 7 de onniasantu de su 2024

Is addòbios de custa coa de chida in provìntzia de Aristanis – Sunt medas is addòbios de custa coa de chida in provìntzia de Aristanis. Milis acasàgiat sa de 35 editziones de sa rassigna de su “Binu de Sardigna”: dae chenàbura a domìnigu is bisitadores ant a pòdere tastare prus de 50 calidades de binu diferentes peri is pratzas e is bias de is bighinados antigos de sa bidda, in su Palàtziu Boyl, me in is pratzas e in sa cortilla de Villa Pernis e in s’anfiteatru dedicadu a Beniamino Bagnolo. Is fainas in programma sunt medas.

In Aristanis, imbetzes, dae eris e fintzas a sàbadu ddoe est su Fèstival ConnEtica, chi faeddat de is temas de sa modernidade, mentras domìnigu a merie, in su Museu Diotzesanu ddoe at a èssere sa mùsica de Edoardo Mancini, protagonista de su de sete apuntamentos de sa de XV rassignas “Domìnigu in cuntzertu”. Sàbadu a merie, in fines, Democratzia Soberana e Populare proponet sa projetzione in su Teatru “Santu Martinu” de su documentàriu “Maidan, sa bia cara a sa gherra”.

E faeddamus de teatru: in su Move The Box de Bàini, sàbadu a merie cumentzat su fèstival “Teatru pro famìllias 2024” cun “Cuguddeddu pipia infadosa”, un’ispetàculu cun atores e pupones de sa Cumpangia “Molino d’Arte” de Altamura. S’incràs a merie at a tocare a “Rodari … a totu annu”, de sa Cumpangia “Teatro del Segno” de Casteddu, de e cun Alessandra Leo e Stefano Ledda e cun Tancredi Ermanno Emmi cun su contrabbassu.

In Samugheo, imbetzes, intra de telas, isculturas de tessìngiu e àteros cuncordos ligados a su territòriu, sàbadu a merie aberit in su Murats sa mustra “Abarrant is filos e is acotzos isceti”, de Daniela Frongia.

Dae oe e fintzas a sàbadu, àteros apuntamentos de su Fèstivas “Istòria” in Arborea, cun una mirada a su tempus passadu; in Terraba, imbetzes, sàbadu a merie, in Su Magasinu de Akràxiu, ddoe faghent sa presentada de su libru “Prus in fundu”, iscritu dae is presoneras de su presone de Uda.

Pro acabbare, s’ex parlamentare Luigi Manconi chenàbura a merie presentat me in s’Auditorium comunale de Ilartzi su libru suo “S’isparessimentu de is colores”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.