Novas Aristanesas, giòbia 14 de onniasantu de su 2024

Novas Aristanesas, giòbia 14 de onniasantu de su 2024

Mùsica, cultura, isport e salude: addòbios meda in provìntzia de Aristanis custa coa de chida – In Aristanis, dae cras e fintzas a domìnigu, sa sala noa de su Csb Sottovoce Oristano (in bia de Ilartzi) at a acasagiare sa Copa Itàlia de biliardu paralìmpicu. Semper in Aristanis, cras sero in su Museu Diotzesanu, sos cadderis, sos fantes e s’esèrtzitu arborensu in su Treghentos ant a èssere su tema de una cunferèntzia chi at cuncordadu s’Istar: sa relata manna dd’at a fàghere Maurizio Casu. Sàbadu, imbetzes, s’at a chistionare de salude e preventzione in su Tzentru Cummertziale Porta Nuova cun sa de IV editziones de “Obiettivo Prevenzione”: ddoe ant a èssere presentes ispetzialistas meda pro dare consulèntzias gratis. 

Domìnigu a sero, cuntzertu de su Trio Ellipsis: s’addòbiu est in su Museu Diotzesanu a intro de sa de XV rassignas de “Domìnigu in Cuntzertu” de s’Ente “Alba Pani Passino”. Ant a sonare Fortunato Casu su violinu, Fabrizio Meloni su violontzellu e sa pianista Emanuela Serra.

In Arborea sighit su festival “Istòria”, sa rassigna de fainas pro connòschere sas Tzitades de Fundatzione. Addòbios meda in programma dae oe fintzas a sàbadu: dae sa projetzione de “Ambientiamoci” a sas iscolas a àteros cunvènnios in su MUBA e in su Teatru de sos Salesianos. Sos addòbios agabbant cun sa rassigna de teatru ètnicu , “Sa cultura de su connotu”, de sa Pro Loco de Arborea. In su palcu de su Teatru de sos Salesianos, custu mangianu, sa cumpangia de Villorba cun “Volti di Villa Dolcetta”. E a pustis sa de Aristanis, chenàbura sero, cun “La fortuna di Maurizio”. Sa die in fatu, sa cumpangia teatrale de Santu ‘Èngiu at a presentare imbetzes “S’arregallu de is piccio”. In fines, s’ispetàculu “A mi la dimandas a ciccita” de su grupu de Ìtiri, domìnigu a sero.

In fines, in Samugheo, sàbadu e domìnigu, sa de tres editziones de Mojos e Màrigas, su festival agroalimentare de Mandrolisai, unu progetu istratègicu chi at chèrfidu su Comune pro afortiare s’imprendidoria locale.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.