Novas Aristanesas, chenàbura 8 de onniasantu de su 2024

Novas Aristanesas, chenàbura 8 de onniasantu de su 2024

In Aristanis e in Terraba un’àtera possibilidade pro sos presoneris – Su recùperu in unu logu comente a cussu de su presone est possìbile, si est acumpangiadu dae fainas culturales. Cun atividades artìsticas, literàrias o formativas b’est sa possibilidade de si esprìmere, de traballare in contu de sa dignidade pròpia e de si preparare a nche torrare a manera positiva a sa sotziedade.

Cun custa punna s’est mòvidu su progetu de iscritura creadora chi at interessadu, in un’annu, a sas presoneras de su presone de Uta e chi est acabbadu cun sa publicatzione de su libru “Oltre”. Sa regorta de contos iscritos dae sas presoneras s’agiunghet a su murale “Oltre”, fatu in sa setzione de sas fèminas de su presone “Ettore Scalas” e naschet dae su traballare paris intre s’assòtziu Socialismo Diritti Riforme, sa domo imprentadora Pettirosso e su fèstival Liberevento.

Sa presentada de su libru, cuncordada dae s’assòtziu Granate Rosa, s’at a fàghere cras sero in su logu culturale Su Magasinu de Akraxiu in Terraba e su chi si balàngiat dae sas bèndidas s’at a dare a sas presoneras de sa presone de Uta.

Dae s’iscritura a su teatru: comente est acontèssidu un’àteru progetu chi at interessadu a 15 presoneris de su tzircùitu Alta Sicurezza 3 de su presone de Màssama, impignados in una faina de laboratòriu durada giai bator meses.

Sos dischentes de sas iscolas mannas presentes in su presone, s’ITC Lorenzo Mossa e su Litzeu Clàssicu De Castro, presentant s’ispetàculu teatrale “Gramsci spiegadu a fìgia mea”, a incuru de s’atore e regista Paolo Floris, chi at fatu fintzas su laboratòriu de teatru, e cun sa partetzipatzione de sos musitzistas Luca Cadeddu e Pierpaolo Vacca.

A su progetu b’ant leadu parte e l’ant finantziadu s’assòtziu “Pro Antonio Gramsci”; s’assòtziu culturale Pane & Cioccolata e s’assòtziu “Domo anca est nàschidu Antonio Gramsci” de Abas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.