Novas Aristanesas, mèrcuris 9 de mese de ledàmene de su 2024

Novas Aristanesas, mèrcuris 9 de mese de ledàmene de su 2024

Su progetu “Istìddios de Vida” faghet iscola – Is protagonistas de su progetu Istìddios de Vida, promòvidu dae su Cunsòrtziu de Bonìfica Aristanesu, cun s’agiudu de s’ANBI e sa cullaboratzione de s’Ufìtziu iscolàsticu provintziale de Aristanis, sunt istadas s’abba che risursa de primore e sa resilièntzia a su mudamentu climàticu. Ddoe ant pigadu parte oto classes de is iscolas de sa provìntzia.

Is dischentes de Ilartzi, Mòguru, Arcidanu, Sèdilo e Uras ant sighidu cun apentu is addòbios postos a cùrrere e ant traballadu pro fraigare una tarea chi pertocat unu cuncursu fatu pro s’ocasione.

Is premiatziones ddas ant fatas erisero in Arborea e ddoe fiant is autoridades, is istitutziones de sa Regione Sardigna e is Amministradores comunales.

A lòmpere a sa vitòria ex aequo sunt istados is dischentes de sa segundària de primu gradu de is classes 2ª A de Mòguru, 2ª A de Uras e 1ª D de Sèdilo, gràtzias a sa presentada de progetos apretziados e berdaderos.

A sa 2ª A de Mòguru dd’ant premiada pro “s’originalidade e sa fungudesa de sas tareas presentadas, ma puru pro s’acàpiu a sa sustenibilidade climàtica”; sa 2ª A de Uras pro “s’imbentu e s’impignu de is dischentes”; a s’acabbu sa 1ª D de Sédilo pro “sa calidade e craresa de sa tarea proposta, pro sa coerèntzia e cumpridesa de is informos bogados a campu”.

“Disponibilidade e contivìgiu sustenibile de s’abba rapresentant sa de 6 Punnas de s’Agenda Onu 2030” ispiegat Carlo Corrias, presidente de su Cunsòrtziu, “de lòmpere pro mèdiu de s’agiudu a is comunidades de su logu in s’educatzione e a unu contivìgiu mègius de sos impiantos e de is risursas. Semus cuntentos de sa gana e de su presu mustrados dae is classes chi ant pigadu parte a su progetu nostru e pro s’impignu de totu is dischentes”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.