Novas Aristanesas, mèrcuris 30 de mese de ledàmene de su 2024

Novas Aristanesas, mèrcuris 30 de mese de ledàmene de su 2024

Su Campidanu de Terraba degolliadu dae s’abba de custa coa de chida – Sunt imàgines de dolore cussas lòmpidas in is dies passadas dae su territòriu de Terraba, interessadu forte dae sa temporada chi est calada in su tzentru e in su Cabu de Giosso de sa Sardigna in sa note intra sàbudu 26 e domìnigu 27 de su mese-de-ledàmene. Su Cumandu provintziale de is Vìgiles de su Fogu at dèpidu pesare in campu totu is iscuadras pro respùndere a prus de coranta pregontas de agiudu. In prus chi is biddas, cun domos, locales e rugas, ant pagadu unu prètziu artu finas is campos cun terras degolliadas pro sa fortza de s’abba de frùmenes e canales, cun dannos a su laore. Mancari in bidda is dannos non siant istados mannos meda, gràtzias a su de àere postu in seguresa de is cabitzales de is frùmenes, Marrùbiu at declaradu s’istadu de isciacu mannu naturale: segundu is novas, in Sant’Anna depent èssere calados 83,6 millimetros de abba in su tempus de sa note.

Arcidanu puru at bìvidu oras de timoria manna, pro ite su Frùmene Mannu nd’est essidu dae su logu suo e est lòmpidu a bidda cun prus de unu metru de abba. Àteros undamentos sunt arribados a su fàbbricu de s’iscola, chi a totu die est abarrada tancada. In Uras s’ammentu est torradu a su 2013: s’abba de su riu de Mòguru fiat intrada a bidda e aiat degolliadu su logu. Dae Terraba arribat una de is fotografias prus de dolore de totu sa temporada: màchinas tiradas dae s’abba e lassadas a suta de su ponte in sa zona artesanale. Chie ghiaiat e is passigeris nde sunt dèpidos essire dae is ventaneddas e ant dèpidu nadare pro si sarvare.

“Cherimus pònnere dinari cun urgèntzia pro nde torrare a istantargiare su chi s’abba at destruidu, pensende a interventos chi serbant pro megiorare sa manera de permìtere a s’abba de andare dae is frùmenes a is canales”, gai at decraradu sa presidenta de sa Regione, Alessandra Todde. “Sa Sardigna no podet abarrare firma pro is emergèntzias, ma depet tènnere sa fortza de artziare sa conca”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.