Novas Aristanesas, mèrcuris 2 de mese de ledàmene de su 2024

In su mese de ledàmene atentu mannu pro sa salude  – Custu mese est dedicadu a sa chirca e a sa preventzione in provìntzia de Aristanis, cun unu muntone mannu de fainas cuncordadas dae is assòtzios de su territòriu.

Si cumentzat cun sa bèndida de sa mela de s’Aism, pro agiudare sa chirca pro gherrare contras de sa isclerosi multipla. S’ùnicu logu in provìntzia in ue at fàghere a nde comporare unu sachitu est Aristanis.

Is voluntàrios ant a èssere presentes in duos logos, cumentzende dae is 9.30 e fintzas a ispatzare is sachitos de mela: chenàbura 4 e sàbadu 5 de mese de ledàmene ant a èssere in sa pratza de Bricofer, in bia Salvo D’Acquisto, e sàbadu etotu e domìnigu in su Tzentru cummertziale “Porta Noa”. At a fàghere fintzas a ordinare su sachitu de mela telefonende a su nùmeru de s’assòtziu 0783.301690 o mandende un’e-mail a s’indiritzu [email protected].

In Parte Montis su 6 de mese de ledàmene est in programma “Gonnostramatza in colore de rosa”, una faina cuncordada dae s’Avis tramatzesu, ghiau dae Maristella Locci, e dae s’Assòtziu “Donadores nàschidos”, cun una caminada de bonucoro e bìsitas senològicas contivigiadas dae dotore Massimo Dessena, cun s’agiudu de Komunque Donne de Aristanis.

Fintzas sa Lilt de Aristanis at a pigare parte a su “Mese de su Nastru in colore de Rosa”, cun una filera de fainas. Sàbadu 5 de mese de ledàmene si prevident bìsitas senològicas in su Tzentru mèigu aristanesu. Chenàbura 11 e sàbadu 12 in su Tzentru cummertziale “Porta Noa” e in pratza de Porta Manna ant a cuncordare unas cantas paradas de informu. Siat is bìsitas siat sa die dedicada a s’informu s’ant a torrare a fàghere sa chida in fatu: si previdet fintzas su cuncordu de unu setzidòrgiu in colore de rosa. 

Sàbadu 26 de mese de ledàmene, a pustis de una die dedicada a is informos, est in programma un’ispetàculu musicale acumpangiadu dae is testimonias de fèminas chi ant bintu su càncaru. Su mese de sa preventzione at a acabbare cun àteras bìsitas senològicas chi s’ant a fàghere in Arborea.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.