Novas Aristanesas, mèrcuris 16 de mese de ledàmene de su 2024

S’istajone de s’arrosu in provìntzia de Aristanis – Me in is sartos de Aristanis e a inghìriu custas sunt sas dies de s’incùngia. S’incùngia de s’arrosu est agiomai un’unicum in Sardigna, unu coltivu chi piessignat su cumpartu agrìculu de su logu.

A sa provìntzia de Aristanis dda connòschent in cale si siat logu de Itàlia pro sos produsimentos suos de primore. S’arrosu incungiadu ddu cunsiderant, pro calidade, intra de sos mègius chi s’agatant in Itàlia e comente arrosu de sèmene puru, pro is piessignos cosa sua chi tenet. Me in is ùrtimos annos, prus a prestu, si sunt ispainados meda is coltivos de s’arrosu pro punnare a arribbare a sa coghina puru.

No est pro de badas chi, immoe, me is paristàgios de is butegas s’agatant is cunfetziones de is produsidores de su logu, finas a pagu tempus a oe mancantes. Sa filera s’est ammanniada. Pro donare valore a su produsimentu incungiadu me in is 3.000 e passa ètaros de terra aristanesa prenos a arrosu, si sunt ispartas fainas pro megiorare e traballare su produsimentu.

Non pro de badas, rassignas de importu, ant dezìdidu de donare bundu a s’arrosu. Simaghis at acasagiadu, chida passada, sa sagra de su connotu; unu momentu de addòbiu intra de is operadores e unu momentu de iscoberta de is ritzetas pro coghinare s’arrosu. Sa Càmera de cummèrtziu de Casteddu – Aristanis donat valore a s’arrosu de su logu in sa rassigna cosa sua “Is ìsulas de su gustu”, chi in custas chidas puru ponet paris ristorantes, agriturismos, tratorias e magasinos impignados in sa ristoratzione. Custa est una testimonia de una crèschida de su cumpartu agrìculu de s’arrosu aristanesu, chi però at a dèpere parare fronte a sas dinàmicas de is mercados internatzionales.

A is mercados ddos cunditzionat sa prudutzione chi nde benit dae Àsia, pro ite ca est barata meda. Su coltivu de s’arrosu depet parare fronte fintzas a sa gestione de unu bene pretziadu puru: s’abba.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.