Novas Aristanesas, martis 8 de mese de ledàmene de su 2024

Novas Aristanesas, martis 8 de mese de ledàmene de su 2024

Cunfrontu intra de educadores in Biddobrana – Sunt prus de 40 is insegnantes, bibliotecàrios e educadores pro sa pipiesa chi arribant dae ònnia ala de Sardigna chi si sunt addobiados in Biddobrana pro pigare parte a sa die de formatzione intitulada “Lèghere totus, crèschere impare”.

Cuncordadu dae s’assòtziu culturale Lughenè, s’addòbiu faghiat parte de sa rassigna “Famìlliachileghet” e at ofertu un’aprofundimentu e unu meledu in contu de sa Comunicatzione Creschidora Alternativa.

S’addòbiu dd’at ghiadu Anna Peiretti, rapresentante de sa Fundatzione Paideia de Torinu, esperta in su setore de s’editoria pro sa pipiesa e promovidora de sa leghidura discansosa.

“Sa Comunicatzione Creschidora Alternativa est un’aina forte pro chi is logos educadores nostros siant inclusivos, dae is iscolas a is bibliotecas. Faghet praghere a beru su bìere su presu de is chi ddoe ant pigadu parte, chi ant mustradu interessu meda pro s’aplicu de custas cumpetèntzias noas in is logos anca traballant”, at naradu Anna Peiretti a s’acabbu de s’addòbiu.

Sa tarea fiat sa de frunire ainas utilosas a is professionistas de su mundu de s’educatzione. “Custa formatzione est istada un’ocasione de importu de crèschida professionale pro is chi ddoe ant pigadu parte. Gràtzias a sa ghia esperta de Anna Peiretti, amus frunidu ainas utilosas pro seberare, propònnere e lèghere libros de calidade. Custas ainas ant a resurtare de importu mannu pro megiorare su traballu de ònnia die de maistros, bibliotecàrios e educadores”, at naradu Francesca Frongia, responsàbile organizadora de Famìlliachileghet.

Famìlliachileghet est unu progetu de promovimentu de sa leghidura pensadu dae s’assòtziu culturale Lughenè: lòmpidu a sa de duas editziones, est dedicadu a is pipias e a is pipios intra de 0 e 6 annos, a is famìllias e a totu su personale pro sa pipiesa.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.