Novas Aristanesas, martis 29 de mese de ledàmene de su 2024

Novas Aristanesas, martis 29 de mese de ledàmene de su 2024

Tamàtiga e olia: cumparàntzia intra de is coltivos – Unu est ispartu in mìgias e mìgias metros cuadrados, s’àteru in una chentina isceti. Su primu est andadu bastante bene, pro su su de duos imbetzes s’annada no est istada bona meda. In is sartos de sa provìntzia de Aristanis no mancant is diferèntzias intra de is coltivos de sa tamàtiga e cussos de s’olia.

S’istajone de sa regorta de sa tamàtiga est acabbada in su mese de cabudanni, cun un’ismèngua de cantidade cunforma a is annos passados: me in is 110 ètaros de sa provìntzia sa basca manna de austu e su tegadiu de sa tamàtiga, unu babballoti cundidore meda chi est arribadu a Itàlia in su 2008.

Si pro sa tamàtiga si faeddat de unu produsimentu chi si podet bèndere intra de 23.000 e 28.000 tonnelladas, in is terras de sa provìntzia su produsimentu nd’at torradu apenas is ispesas pro is coltivos. “No est istada un’annada bella”, at decraradu su diretore de Coldiretti de Aristanis, Emanuele spanò. “Ddoe est chi nch’est renèssidu a prodùere unos 650-700 chintales de tamàtiga pro onni ètaru. Sa pèrdida de produsimentu, pro calicunu, est istada de su 20-25%”.

Àteras tèndidas tenent is terras cun matas de olia: si contant 6.000 ètaros in sa provìntzia de Aristanis. A diferèntzia de sa tamàtiga, sa regorta de s’olia est apenas cumentzada.

S’ispera est sa de lòmpere a su produsimentu de 4.000 tonnelladas de ògiu comente a ocannu passadu. “Ocannu su produsimentu de olia paret bonu, ma dipendet dae is cussòrgias”, narat su tecnòlogu alimentare Pier Paolo Arca. “Cunforma a àteros annos, in provìntzia de Aristanis is cosas andant mègius, ma sa resa est mesana-bassa. Resurtados bonos s’ant a otènnere in Monteferru, in ue su produsimentu est torrende a crèschere a pustis de su fogu de su 2021. In Sèneghe e in Bonàrcadu su produsimentu est mesanu-bassu, mentras is cosas andant mègius in Paulle. Una situatzione diferente est imbetzes cussa de Aristanis, de Arriora e – a manera prus generale – in su Sinis: de seguru chie at contivigiadu bene is olivàrios at a fàghere unu produsimentu bonu”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.