Novas Aristanesas, martis 22 de mese de ledàmene de su 2024

Novas Aristanesas, martis 22 de mese de ledàmene de su 2024

In Aristanis creschet sa chèscia pro sa sorte de sa Règia de su Giuigadu – Sa nova de su tramudu de is ufìtzios de sa Prefetura de Aristanis a su fàbbricu de pratza de Manno, in ue ddoe fiat su presone betzu de Aristanis, at fatu pesare chèscias mannas in tzitade. A medas non ddis est pràghiu su sèberu, ammentende chi in cue ddoe sunt is restos de Règia antiga de su Giuigadu e duncas unu valore mannu culturale de amparare. Is dibatas ant postu in mesu mescamente a amministradores comunales noos e betzos. Intra de custos, su sìndigu betzu de Aristanis, Guidu Tendas, su primu chi at regordadu a s’Istadu su passàgiu de su fàbbricu a sa Regione e, dae custa, a su Comunu de Aristanis. Tendas at mentovadu comente ddoe siat unu vìnculu pretzisu a susu de su fàbbricu, chi depet èssere respetadu pro sa règulas urbanìsticas de sa tzitade. Si nono, s’at a dèpere votare una règula noa, ma no s’ischit chi s’at a rennèschere.

Is consigieris de sa minoria de su tzentru-manca ant presentadu un’interpellàntzia pedende a su sìndigu Massimilianu Sanna, mentras su presidente betzu de sa Commissione urbanìstica Robertu Martani at apretadu una faina noa pro torrare a sa tzitade sa Règia antiga.

Dae parte sua su sìndigu Massimilianu Sanna at rispostu a is chèscias, presentende s’impreu postu dae s’Amministratzione comunale in custos annos pro otènnere sa Règia giuigale. Ma su sìndigu at naradu puru chi, sena de un’acòrdiu forte cun s’Istadu, s’arriscat isceti de nòghere a unu bene de importu e chi s’Amministratzione istatale cheret lassare a su Comunu sa parte istòrica pro fainas culturales. Fintzas su prefetu, Salvatori Angeri, at naradu chi custa faina podet agiudare a fàghere a manera chi in sa tzitade de Lionora ddoe abarret sa Prefetura.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.