Novas Aristanesas, martis 15 de mese de ledàmene de su 2024

Sa leada de Aristanis praghet a motocross e supermoto – In su 2025 puru, in sa provìntzia de Aristanis s’at a intèndere su frùschiu de is motores: ant ghetadu sa grida, is dies coladas, pro sa torrada de su Mundiale Fim de motocross a Arriora e de cuddu de is Supermoto a Tramatza.

Su primu torrat pro su de chimbe annos a su crossòdromu comunale Le Dune: comente naradu dae Infront Moto Ràcing, s’istajone noa s’at a abèrrere in Còrdoba, in Argentina, su 2 de su mese de martzu. S’at a bolare a Cozar, fache a sa Spagna, e in s’interis de su matessi mese, su 23 s’at a cùrrere su Grandu Prèmiu d’Europa, in Saint-Jean-d’Angély. Su 6 de su mese de abrile su Mundiale at a portare a is pilotas a sa carrera de giarra de Arriora, pro sighire  a coa su 13 in Pietramurata, in Trentinu.

A prus de su Mundiale MXGP, in sa primu coa de chida de su mese de abrile, su crossòdromu Le Dune at a acasagiare s’Europeu EMX 125 e su Mundiale femininu WMX.

In Tramatza, su Sardinia Circuit WS98 at a acasagiare a is mannos de sa Supermoto. Sa Xiem at antitzipadu ca s’annu chi benit ant a èssere ses is grandos prèmios in programma, a prus de sa Supermoto de is Natziones, chi s’at a cùrrere su 21 de su mese de cabudanne in Repùbrica Ceca.

Su 30 de su mese de martzu, is garas mundiales ant a incarrerare cun su Grandu Prèmiu de Ispagna, in Albaida, pro fàghere a pustis tapa a Tramatza, su 4 de mese de maju, cun su Grandu Prèmiu de Sardigna.

Is tapas ant a lòmpere posca a Germània; Ungheria; Piemonte e Bèlgiu. Is matessi logos ant a acasagiare, in s’interis, s’Europeu Junior puru.

Danilo Boccadolce, amministradore Xiem, chi poderat is diritos de su Mundiale de Supermoto e presidente de sa sotziedade MX Pro, de agiudu pro Infront Moto Racing puru, aiat fatu a ischire de sa torrada, in su 2025, de is duos addòbios isportivos de importu a sa provìntzia de Aristanis.

“Nos diat pràghere chi sos de Arriora e Tramatza s’esserent furriados a èssere duos addòbios firmos de sos campionados mundiales. Is tzircùitos aristanesos praghent meda e custu ndi essit a pìgiu mescamente cando cambaradas e pilotas mustrant, cando benint a inoghe, su presu issoro”, aiat naradu in su mese de maju passadu. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.