Novas Aristanesas, lunis 28 de mese de ledàmene de su 2024 

Zrofolliu e Sìmaba chircant de parare fronte a s’ispopulamentu – Su livellu de ispopulamentu creschet semper de prus in Sardigna, prus che totu in is biddas de a intro de s’Ìsula. Una situatzione chi però pertocat fintzas sa provìntzia de Aristanis, in ue unas cantas Amministratziones comunales provant a fàghere arribare residentes noos, gràtzias a is finantziamentos de agiudu pro is Comunes piticheddos.

Est unu disponimentu chi bolet cumbàtere s’ispopulamentu e bolet favorèssere sa coesione sotziale e s’isvilupu econòmicu in cussas biddas chi sufrint de prus custa ismèngua de sa populatzione, favorèssida fintzas dae sa pagu oferta de servìtzios materiales e immateriales pro is persones e pro is siendas.

Pro is chi detzident duncas de acontzare una domo betza o de nde comporare una noa o, ancoras, pro chie detzidet da tramudare sa residèntzia sua a Zrofolliu, ddoe at a èssere unu contributu chi non bolet torradu. Su Comune, ghiadu dae Pinuccio Chelo, at publicadu unu bandu, cun iscadèntzia pro presentare sa domanda istabilèssida pro su 20 de onniasantu. Dd’ant a pòdere presentare is chi non sunt giai residentes in Zrofolliu sa die de sa publicatzione de su bandu.

Su Comune de Sìmaba puru at detzìdidu de favorèssere a is chi bolent bìvere in custa bidda de Parte Montis: chie at a comporare una domo e at a tramudare sa residèntzia a custu comune at a pòdere retzire unu contributu chi non bolet torradu. Su bandu previdet unu bonus fintzas a 7.500,00 èuros, chi si podent acabidare cun su contributu regionale de 15.000,00 èuros pro sa còmpora de sa prima domo in is comunes piticheddos. Sa presentada de sa domanda scadit a sa una de su 14 de onniasantu.

“Custa faina, pro immoe isperimentale ma chi s’at a furriare a istruturale me in is meses imbenientes, dda tenaiamus in su programma nostru pro su chi pertocat sa gherra a s’ispopulamentu”, at naradu su sìndigu de Sìmaba, Gianmarco Atzei. “Bolemus agiudare a chie s’at a comporare una domo in bidda nostra e at a tramudare sa residèntzia sua a Sìmaba”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.