Novas Aristanesas, lunis 21 de mese de ledàmene de su 2024

Intzidentes istradales, prus pagu mortos. Intzidentes in su traballu, prus mortos. Datos bellos e malos in provìntzia de Aristanis – S’essida in custas dies de unas cantas istatìsticas at mustradu comente sa provìntzia de Aristanis siat in contratendèntzia cunforma a su chi acontesset in is àteras partes de Sardigna. Custu est de importu, pro ite ca custas istatìsticas pertocant is nùmeros de is mortos e de is persones ingortas me in is intzidentes istradales. Àteros datos, imbetzes, ponent pistighìngiu, est a nàrrere cussos in contu de is intzidentes me in su traballu, in ue su nùmeru de is mortos punnat a crèschere.

A tenore de is datos bogados dae Aci-Istat, chi però amegant ancoras de ddos agiornare, in su 2023 sa Sardigna est sa regione in ue su nùmeru de mortos in intzidentes istradales – sete onni 100mìgia abitantes – est resurtadu prus artu cunforma a sa mèdia italiana, sa provìntzia de Aristanis però est cussa in ue s’est connota s’ismèngua prus arta de su nùmeru de mortos: -64% (5 mortos in su 2023, mentras fiant istados 14 in su 2022).

Pro su chi pertocat imbetzes is infortùnios me in is logos de traballu, in provìntzia de Aristanis sunt acontèssidos prus pagos intzidentes, mentras sunt crèschidas is maladias professionales e su nùmeru de is mortos. Me in is primos oto meses de su 2024 – segundu is datos regortos dae s’Inail e istudiados dae s’Anmil – is denùntzias de infortùnios in su traballu sunt istadas 732 (-6,9% cunforma a sa simana ghennàrgiu-austu 2023). Is infortùnios mortales sunt istados duos, mentras in sa pròpia simana de s’annu in antis non si fiat connota morte peruna. In prus, semper in provìntzia de Aristanis, sunt istadas 902 is maladias professionales denuntziadas intra de ghennàrgiu e austu de su 2024, cun una crèschida de su 42,7% cunforma a sa pròpia simana de su 2023.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.