Novas Aristanesas, giòbia 3 de mese de ledàmene de su 2024

Sa coa de chida in provìntzia de Aristanis – Addòbios meda in sa coa de chida in provìntzia. Nurachi acasàgiat un’editzione noa de “Nuracque – Intritzos culturales”, chi dae chenàbura a domìniga at a tramudare su coro de su Sinis in unu rugheri biatzu de arte, natura, traditziones, cun fainas intregadas a mannos e pitzinnos.

In Aristanis domìniga sero s’at a torrare a sas atmosferas ispantosas de su 1800 cun sa rassigna “Domìniga in Cuntzertu” de s’Ente pro is Cuntzertos. Subra de su palcu de su Museu Diotzesanu, ddoe at a èssere su Trio Armònica Dantza in su cuntzertu “Schumann e s’Ispìritu Romànticu”.

In tzitade etotu, sàbadu e domìniga nche at a èssere sa de tres editziones de Fàulas, su fèstival organizadu dae Ans – Assemblea Natzionale Sarda – chi gherrat contras de sos pregiudìtzios comunes de Sardigna, un’editzione fata de addòbios, laboratòrios, cuntzertos e àteros apuntamentos culturales. In prus, ancoras, apuntamentu dòpiu sàbadu sero cun sa serrada de sa mostra “F**king Change – Aici giustu, aici faddidu”, me in sa Pratza de sos Boes.

In Gonnostramatza, domìniga a mangianu “in rosa” cun sa passigiada de bonucoro e bìsitas
senològicas a gratis. In Tzeddiani, su mundu animale, castiadu peri sos ogros de tzia Verònica Serra, at a èssere su protagonista sàbadu e domìniga, cun s’apuntamentu chi ocannu puru regordat a s’artista naïf de sa bidda. Pro sos prus piticheddos ddoe ant a èssere istentos meda: mustras de arte, laboratòrios artìsticos, bìsitas ghiadas e ispetàculos.

Pro acabbare, sa de 32 editziones de s’Eurobirdwatch: duas dies intregadas a sa migratzione fata in atòngiu dae sos pigiones, su prus eventu nòdidu europeu intregadu a s’ornitologia. Sàbadu a merie ant a fàghere una passigiada a bitzicleta chi at a mòvere dae sa pratza de is Mortos in su Traballu, in Terraba: s’at a passare peri sa leada ùmida de Marceddì, Santu Giuanni e Santa Maria. S’incràs, a mangianu, dae su portu turìsticu de Turre Manna, ddoe at a èssere s’averiguadura de is genias de pigiones chi bivent in intro de su golfu de Aristanis, faina pesada cun s’agiudu de sa sotziedade sarda de s’Afni e de Mar.Eco Osservatòriu de sa Natura.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.