Novas Aristanesas, giòbia 24 de mese de ledàmene de su 2024

Novas Aristanesas, giòbia 24 de mese de ledàmene de su 2024

Is apuntamentos de custa coa de chida in provìntzia de Aristanis – Custa coa de chida puru at a èssere rica meda de addòbios in provìntzia de Aristanis: Biddobrana acasàgiat sa de 25 editziones de sa “Sagra de su Pane”, apuntamentu oramai abetadu onni annu dae mìgias e mìgias bisitadores chi bolent tastare su pane modde biddobranesu e is àteros màndigos de su connotu de custa bidda a pees de su Monte Arci e de su Monte Grìghini. Dae chenàbura e fintzas a domìnigu, in programma tastaduras, ispetàculos, folclore e unu muntone de àteras cosas bellas. S’at a pòdere bìere fintzas su faghimentu de su pane e, intra de is novas, s’ant a pòdere bìere is “Olimpias”, cun is giogos sardos de su connotu.

In Busache ddoe cuncordant “Busache e is colores suos”, sa rassigna dedicada a su folclore chi, a pustis de sa prima die chi aiant fatu in su mese de trìulas, si presentat como cun is colores de atòngiu, sàbadu a merie, in sa crèsia de Santu Domìnigu, in ue ant a cantare is mègius tenores e coros polifònicos de Sardigna.

Tramudende a Marmidda, in Aressa si podet bìere un’antìtzipu de sa festa de is santos e de is mortos, chenàbura a merie, in sa biblioteca comunale, cun su laboratòriu criadore de Halloween pro is pipios. Nureci, imbetzes, domìnigu a mangianu acasàgiat s’addòbiu de is màchinas e de is mototzicletas antigas, mentras in Bàini, semper domìnigu, in sa prentza betza de bia de su Notàriu Salis, ddoe faghent “Is montigros de a fache”, una faina in contu de sa vida e de is òperas de Beppe Fenoglio.

In Aristanis, imbetzes, ddoe cuncordant is “Notes grogas – Petza arrustida in pratza”, una faina pensada dae Coldiretti e dae Campànnia Amiga de Aristanis, sàbadu a merie, in pratza de Porta Manna. A mangianu, in pratza de Tzitade, ddoe at una faina dedicada a su cane e a is adotziones, cun s’interessamentu de entes, istitutziones e voluntàrios. Domìnigu a merie su Museu diotzesanu acasàgiat su de chimbe apuntamentos de sa de XV rassignas “Domìnigu in cuntzertu” de s’Ente pro is Cuntzertos, cun sa loba formada dae Ilaria Vanacore (sopranu) e Marco Schirru (pianista).

In Santeru, in fines, acabbat sa de 8 editziones de su Fèstival Progetu Mediterrànea CFD, cun s’ispetàculu de su poeta e cantautore Antonello Colledanchise e su sopranu e clarinetista Susanna Carboni, in programma sàbadu a merie in sa crèsia de Santu Sarvadore.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.