Novas Aristanesas, giòbia 10 de mese de ledàmene de su 2024

Sa coa de chida in provìntzia de Aristanis –  Sunt medas is apuntamentos in custa coa de chida in provìntzias de Aristanis. Cumentzamus dae Aristanis, cun su cuntzertu de su pianista tataresu Roberto Piana pro su de tres meries de sa de XV rassignas “Domìnigu in Cuntzertu” de s’Ente pro is Cuntzertos. Domìnigu a merie nche at a artziare a su palcu de su Museu Diotzesanu Arborensu su recital “Itàlia e Rùssia a cunfrontu”. Ma ddoe at a àere fintzas logu pro s’isport cun is giòvanos ispetzialistas de su foil chi, dae su 7 de mese de ledàmene e fintzas a domìnigu, ant a fàghere a trivas in su mare de su Golfu de Aristanis, in Turre Manna, cun su Formula Kite Youth European Championship e sa Copa Itàlia de Wingfoil. Ispàssiu meda fintzas pro afestare is primos 30 annos de fainas de s’Eolo Beach Sports.

Atmosferas de atòngiu, imbetzes, in Sèdilo cun “Genias de atòngiu” e “Ichnos – Sonos de bonucoro”, is duos addòbios chi ant a abbiatzare sa bidda de Guiltzier sàbadu e domìnigu. Sàbadu a is 10.00 ant a abèrrere is paradas de “Genias” e s’at a sighire fintzas a meritzeddu cun laboratòrios, bìsitas ghiadas, ispetàculos e unu muntone mannu de traditzione. A merie, cumentzende dae is 15.30, at a abèrrere fintzas su palcu de Ichnos, in pratza de Santu Giuanne Batista, cun is sonos de s’Ìsula pro su bonucoro. S’incràs s’at a cumentzare a is 10.00 cun s’abertura de is paradas e s’at a sighire fintzas a su note cun sa cunsigna de su prèmiu Ichnos 2024.

E, ancoras, in Simaghis, sàbadu e domìnigu, ddoe faghent sa de 30 editziones de sa sagra de s’Arrosu, chi lompet a 30 annos, mentras in Fordongianus ddoe afestant sa Die natzionale de su caminare, chi sa Feder Trek regordat cun duos addòbios: sàbadu cun “Bike & Trek”, mentras domìnigu cun una die dedicada a istòria e natura, cun passigiadas a pee, a bitzicleta e a caddu in àndalas simpres, sena de fàghere a trivas.

In fines, in Sabarussa ddoe est sa festa de Santu Gregori Mannu: a prus de is novenas, domìnigu ddoe est in programma fintzas un’addòbiu de pisca.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.