Novas Aristanesas, mèrcuris 4 de cabudanni de su 2024

In Aristanis un’addòbiu in contu de is presones de s’Ìsula – S’at a faeddare de is cunditziones de vida e de sa torrada a sa sotziedade de is persones impresonadas in Sardigna cras – 5 de cabudanni – in Aristanis in s’addòbiu “Su presone cun is muros de bidru: trasparèntzia e su èssere acanta”.

Cumentzende dae is 9.30 s’Hotel Mistral 2 at a acasagiare custu addòbiu de importu, chi at a comintzare cun una parte dedicada a sa formatzione e a sa testimonia, cun interventos de para Gabriele Iiriti, capellanu de su presone de Casteddu-Uta, e de Carla Chiappini, giornalista e caburedadora de “Ristretti orizzonti” pro su presone de Parma.

Sa de duas partes de s’addòbiu, chi at a torrare a cumentzare a is tres e mesu de merie, dd’ant a dedicare imbetzes a un’analizu de is problemas e a unu meledu in contu de is prospetivas de is presones, cun una filera longa de interventos.

A pustis de is saludos de su sìndigu de Aristanis, Massimiliano Sanna, e de is àteros rapresentantes istitutzionales, ant a faeddare munsennore Giuseppe Baturi, segretàriu generale de sa CEI, Mario Galati, proveditore pro sa Sardigna de su Dipartimentu de s’amministratzione penitentziària, Maria Cristina Elisabetta Ornano, presidente de su Tribunale de miramentu de Casteddu.

Sighende, at a faeddare Desirè Manca, assessora regionale de su Traballu, formatzione professionale, cooperatzione e seguresa sotziale, is abogados Irma Conti e Mario Serio de su Collègiu de su garante natzionale de is persones chi ant pèrdidu sa libertade personale e Maria Francesca Cortesi, dotzente de Diritu protzessuale penale de s’Universidade de Casteddu. At a intervènnere fintzas su senadore Andrea Ostellari, sutasegretàriu de sa Giustìtzia. Su cunvegnu dd’at a ghiare sa giornalista Carla Chiappini.

S’addòbiu ddu cuncordant sa Caritas diotzesana e su garante de is diritos de is persones chi ant pèrdidu sa libertade personale de su Comune de Aristanis.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.