Novas Aristanesas, mèrcuris 11 de cabudanni de su 2024

Arribende s’atòngiu est? – A pustis de dies de basca manna e de un’istadiale chi pariat chi no esseret acabbada prus, in custas dies amus a tènnere una prima tastadura de atòngiu.

Ddu narat fintzas su meteoròlogu de Sardigna Clima, Dario Secci, chi cunfirmat s’arribu de àera frida a su Mediterràneu, in deretura dae su Mare de su Nord. “S’impeoramentu”, at naradu, “s’abetat in sa coa de chida: at a pròere in sa parte otzidentale de s’Ìsula e is temperaduras s’ant a abbassare totu in una.”.

Segundu is previsiones de s’Aeronàutica militare, in Aristanis sa die de oe at a èssere cun su chelu annuadu, cun abba chi si previdet pro sa die de cras e un’abbassamentu de sa temperadura fintzas a sa coa de sa chida.

Si chenàbura e sàbadu s’at a torrare a bìere s’àera lìmpia, sa colunnedda de mercùriu no at a propassare is 22 grados, cun bator grados in mancu cunforma a is temperaduras màssimas prevìdidas pro oe e pro cras. Sa temperadura mìnima de sàbadu at a èssere de 14 grados, mentras in is àteras dies s’ant a presentare intra de 21 e 18 grados.

Sa pròpia situatzione s’at a presentare in Bàini: oe su chelu at a èssere annuadu, mentras pro cras si previdet abba dae mangianu fintzas a merie. Chenàbura e sàbadu su chelu at a torrare lìmpiu o pagu annuadu. In Marmidda puru sa temperadura s’at a abbassare dae is 24 grados de oe fintzas a is 20 grados de chenàbura, cun una crèschida de duos grados sàbadu cunforma a sa die in antis. Is pròpias temperaduras e previsiones mèteo si prevident pro Bosa.

In Santu Lussurzu puru si previdet una giòbia de atòngiu piessignada dae s’abba. Oe sa temperadura màssima est de 23 grados e sa mìnima de 15, mentras cras e chenàbura sa colunnedda de mercùriu no at a propassare is 20 grados, cun is mìnimas chi s’ant a abbassare fintzas a 12 grados. Si sàbadu is temperaduras màssimas ant a arribare a 20 grados, is mìnimas s’ant a abbassare ancoras fintzas a 10 grados.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.