Novas Aristanesas, martis 17 de cabudanni de su 2024

Su Portu de Aristanis mudat bisura – Una bisura noa pro su portu de Aristanis–Santa Justa, chi punnat a megiorare is infrastruturas suas. Difatis, ant acabbadu una faina istruturale noa de s’iscalu, chi donat una bisura noa a is làcanas doganales e de seguresa de su portu, in prus de illestrire is fainas de castiamentu de su logu.

Sa bisura noa permitit unu sètiu prus ordinadu e un’impreu prus profetosu de is 11 ètaros e prus de is logos a palas de is banchinas puru, chi, dae inoghe a pagu tempus, ddos ant a intregare a fainas industriales, cummertziales e logìsticas noas. Ant prevìdidu una bella pariga de interventos infrastruturales, pro fraigare àteras àreas operativas de sas pratzas de banchina.

Is 800 metros lineares de su sètiu nou faghent a bìdere barrancos in tzimentu de genia new jersey e pannellos pro frànghere su sàrtiu (orsogrill), cun tres intradas ladas 8 metros e lacanadas dae portales iscurrevoles automatizados e un’istrutura prefabbricada pro is fainas de seguresa portuale.

Sa bisura noa, prus profetosa pro sas fainas, aberrit sa carrera a unu muntone de interventos infrastruturales e a sa manutentzione chi nd’aiat faeddadu fintzas su ministru de is Infrastruturas e de is Trasportos Matteo Salvini, in collegamentu dae Roma in s’interis de s’addòbiu chi su prefetu Angieri at convocadu pro averiguare is istrategias prontas a megiorare s’isvilupu de su portu; su ministru at torradu a sutalineare is impignos pigados pro su bene de s’iscalu portuale aristanesu/santajustesu.

“Su portu de s’Aristanesu no est un’iscalu de sèrie B”, at acraradu Salvini, “ddi meresset totu s’atentu dae parte de su Ministèriu. Est un’iscalu tzentrale, acapiadu a sa dorsale ferroviària e a sa carrera Càralu Felice. Non ddoe sunt problemas de resursas, ma tèngio bisòngiu de progetos pro bìdere e intervènnere in contu de is problemas chi connoschimus bene”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.