Novas Aristanesas, martis 10 de cabudanni de su 2024

Is istudiantes torrant a cumentzare s’iscola, ma pensende a is dies de vacàntzia – Dae custu mangianu unu barrocu de dischentes de sa segundària de segundu gradu de sa provìntzia ant intèndidu su sonu, dae issos connotu bene, de sa campanedda, chi los at portados torra a sos bangos de iscola pro nche passare un’annu de istùdiu nou.

Custu mangianu ant cumentzadu su litzeu clàssicu “De Castro” de Aristanis e de Terraba e s’Istitudu de arte “Contini” de su cabu-de-logu.

S’iscola magistrale “Benedetto Croce” at fatu cumentzare s’annu de iscola a sas primas, sas segundas, a is de tres e a is de chimbe classes, mentras is de bator classes ant a torrare cras a iscola.

In s’Istitudu “Don Deodato Meloni” is dischentes noos ant cumentzadu s’annu de iscola custu mangianu. Totus is àteras classes ant a tènnere ancoras un’àtera die de vacàntzia.

In s’Istitudu “Mariano IV d’Arborea” de Aristanis e Ilartzi sunt torrados custu mangianu is pitzocos de segunda, de sa de tres, sa de bator, de sa de chimbe classes giai dae sas 8.30, mentras a is 8.45 ant cuncordadu s’intrada de is primas. Cras at a tocare a is dischentes de s’Istitudu industriale “Othoca” de Aristanis e Abas.

Sa coa de su carru dd’ant ocupadu is dischentes de s’Istitudu “Lorenzo Mossa”: sa campanedda at a sonare, pro issos, petzi giòbia 12 pro su biènniu e su 13 de su mese de cabudanni pro su triènniu.

Is dischentes, pro agatare cunfortu pro more de sa torrada a iscola, podent cumentzare a pensare a is vacàntzias chi ant a bènnere: ocannu s’1 de santandria ruet de chenàbura e duncas s’at a abarrare in domo finas a lunis 4. Paschichedda at a èssere in mèrcuris, duncas si podet pensare chi is iscolas potzant meledare de fàghere cumentzare is vacàntzias giai dae su 20 de su mese de nadale.

Pasca Manna, in s’annu 2025, at a èssere su 20 de abrile, duncas carchi istitutu at a pòdere meledare de allonghiare is vacàntzias finas a sa Festa de sa Liberatzione. Mancu su tempus de torrare a iscola chi giai ddoe ant a èssere àteras dies de vacàntzias: Sa Die de sa Sardigna e su Primu de Maju. In antis de s’acabbu de s’iscola, s’at a abarrare in domo su 2 de su mese de làmpadas puru, chi ruet in lunis.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.