Novas Aristanesas, lunis 30 de cabudanni de su 2024

Novas Aristanesas, lunis 30 de cabudanni de su 2024

Unu cursu nou de informàtica in su Cunsòrtziu Unu – Megiorare, crèschere e diferentziare semper de prus s’oferta didàtica sua. Est su chi cheret fàghere su Cunsòrtziu Unu de Aristanis, chi at detzididu de incarrerare unu cursu de làurea triennale de Informàtica pro su 2025.

“Est una bidea chi porto semper in conca”, at naradu Andrea Santucciu, rapresentante de su Comune de Aristanis in su Cussìgiu diretivu de s’ente universitàriu. “Semus traballende pro cussu. Sos istudiantes ant a pòdere impitare sos laboratòrios de s’Istitutu Othoca, amus giai chistionadu cun su dirigente iscolàsticu, professore Franco Frongia, chi at dadu sa disponibilidade sua”.

Pro como, sas ofertas didàticas de su Cunsòrtziu Unu sunt sos cursos de tres annos in Economia e Gestione de sos servìtzios turìsticos e Biotecnologias industriales, ambos duos cun s’Universidade de Casteddu, ma fintzas Tecnologias de sa bide, enològicas e alimentares, cun s’Universidade de Tàtari.

Semper a intro de s’oferta formativa de s’Universidade de Aristanis, ddoe sunt su cursu de làurea magistrale in Calidade e Seguresa de sos produtos alimentares e s’Iscola de ispetzializatzione in Benes archeològicos, cun s’Universidade de Tàtari.

Sas istudiantes e sos istudiantes iscritos, a die de oe, sunt belle de 630: prus o mancu duas partes de tres arribant dae foras de Provìntzia. Su nùmeru giustu de sos iscritos pro s’annu acadèmicu nou non s’ischit ancorsa a seguru, ma su diretore generale Francesco Asquer at cunfirmadu ca una norantina de istudiantes ant giai acabbadu s’immatriculatzione.

Sas iscritziones sunt cumentzadas a metade de su mese de trìulas e, pro como, est agabbadu solu su tempus de si nche iscrìere a su cursu de Biotecnologias.

Sas letziones de su Cunsòrtziu Unu si faghent in su Cunventu de su Cramu, in su tzentru laboratòrios in Arburada de Diaz e in sa sienda didàticu-isperimentale de s’Universidade de Tàtari in Fenosu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.