Novas Aristanesas, lunis 23 de cabudanni de su 2024

Una coa de chida pro agiudare s’ambiente cun “Lìberos dae sa Plàstica” – In provìntzia de Aristanis puru sa coa de chida chi benit sunt in programma sas fainas de “Lìberos dae sa Plàstica”. Giai abertas sas iscritziones a “Sea & Rivers”, sa manifestatzione de livellu natzionale dd’ant programmada in Abarossa, in territòriu de Santa Justa.

In sa plaja de sa bidda oru oru de istàniu s’addòbiu est pro domìniga chi benit, su 29 de cabudanni, cando s’unda biaita de sos voluntàrios de s’Onlus, coordinada dae sos referentes Angela Maria Collu e Andrea Pigato, at a cumintzare su traballu pro liberare sa natura dae plàstica e àliga.

S’addòbiu est in programma a sas 9.30 in su tretu de su locale “Porta d’Occidente”. Sa manifestatzione dd’ant cuncordada cun s’agiudu de su Comune de Santa Justa.

Sos tzitadinos si nche podent iscrìere intrende a su giassu www.plasticfreeonlus.it, seberende s’addòbiu de Santa Justa a intro de sa setzione eventos.

Sa die in antis, imbetzes, sa Marmidda acasàgiat un’àtera faina. Sàbadu 28 de cabudanni, a sas ses de merie, ant protagonistas ant a èssere sos voluntàrios de duas cambaradas diferentes, ma chi cumpartzint sa matessi idea: torrare a nou unos cantos giassos de sa zona e regòllere sas ampullas de plàstica ispartzinadas in sos oros de sos caminos, in sos tretos a posta pro si firmare e a dolu mannu in mesu de su sartu. S’addòbiu est in su giassu de s’istatale 443, a ogros a s’agrìcula Floris tra Escovedu e Useddus.

Sa faina dd’isponsorizant sos Comunes de Useddus e Ollasta; ant aderidu s’Assòtziu culturale Julia Augusta, Escovedu in movimentu e sa Pro loco de Ollasta. Ant dadu una manu de agiudu su B&B “il giardinetto” de s’Alighera e s’isponsor MINI. Pro custa àtera faina puru sas iscritziones cherent fatas in su giassu www.plasticfreeonlus.it, chirchende Useddus intra de sos eventos. Sos organizadores racumandant de si bestire comente si depet cun botinos adatos e guantes.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.