Novas Aristanesas, giòbia 19 de cabudanni de su 2024

Novas Aristanesas, giòbia 19 de cabudanni de su 2024

Is addòbios in custa coa de chida in provìntzia de Aristanis – Sunt medas in sa coa de chida sos addòbios in provìntzia intra de fide, traditziones, isport e mùsica.

Sunt dies de festa in Bonàrcado pro Nostra Sennora de Bonacatu, chi faghet lòmpere onni annu a sa bidda de Monteferru unu muntone de devotos. Eris e oe su prus de sas funtziones religiosas ma non solu. Su Comune, paris cun sa Pro Loco, at cuncordadu fintzas unu programma prenu de addòbios pro sa festa tzivile fintzas a sàbadu e poi su 29 de cabudanni. Custu sero cuntzertu in s’anfiteatru comunale de sos Janas , cras sa cummèdia sarda e sa cumpangia teatrale Bardunfula e sàbadu imbetzes su cuntzertu “ Cantos internatzionales de Monteferru”.

In Aristanis sighit su Cabudanni aristanesu cun addòbios meda: custu sero in sa biblioteca comunale sa presentada de su libru de Marcello Atzeni “Quattro mori a cinque cerchi. I sardi alle Olimpiadi dal 1908 al 2024”. Cras bisitas a sa Turre de sa costera de Turre Manna cun ArcheoeventiaOristano e a su sero in su Tzentru Documentatzione Sartiglia sa chirca a su siddadu “Chie e in ue” de sa Fundatzione Aristanis e in Pratza Duomo su cuntzertu “ Note per Bianca” a incuru de s’Unicef – Comitadu de Aristanis. Sàbadu e domìniga imbetzes ddoe est sa festa de Sant’Efis. Non cheret pèrdia, semper sàbadu sero ma in su giassu de arburada de sa Repùblica, sa semifinale de sa de 13 editziones de Rock in Contea, eventu chi faghet lòmpere onni annu a su palcu de Aristanis deghinas de grupos musicales dae totu s’ìsula.

In fines in Crabas, faghet a provare gratis fitness, càlciu, basket, canoa, danza, artes martziales, tennis sàbadu a serigheddu in pratza de s’Istàniu cun Unu mundu de isport e a su sero “Boxe in laguna” paris cun sa Corner Gym Boxe de Aristanis: in su ring deghe intra de sos mègius pùgiles diletantes de Sardigna. S’addòbiu pro promòvere s’isport est cuncordadu paris cun s’Assessoradu a sos Ispetàculos e a s’Isport e a sa Consulta de sos Giòvanos de Crabas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.