Novas Aristanesas, chenàbura 6 de cabudanni de su 2024

Is sìndigos de sa provìntzia faeddant de is impiantos pro su produsimentu de energia dae fontes annoàbiles – “Amus a agatare impare sa solutzione mègius pro sa Sardigna”. Est su chi at naradu sa presidente de sa Regione Sardigna, Alessandra Todde, in dae in antis de prus de chentu sìndigos e amministradores de sa provìntzia de Aristanis chi martis fiant presentes in s’addòbiu cuncordadu in Aristanis pro faeddare de is àreas adatas, no adatas ordinàrias e de cussas vinculadas pro su cuncordu de impiantos pro su produsimentu de energia dae fontes annoàbiles.

Presentes fintzas s’assessore de is Entes locales, de is Finàntzias e de s’Urbanìstica Francesco Spanedda, s’assessore regionale de s’Indùstria Emanuele Cani e s’assessora de sa Defensa de s’ambiente Rosanna Laconi.

“Est istadu un’addòbiu profetosu”, at naradu sa presidente Todde. “Amus cumpartzidu informos, regortu is inditos e su pistighìngiu in contu de sa gestione de is resursas energèticas, sutaliniadu su bisòngiu de àere unu Pranu energèticu regionale e una Sotziedade Energètica de sa Sardigna, prevìdida dae sa Lege 5/2024”.

Intra de is àteros, est intervènnidu su sìndigu de Aristanis Massimiliano Sanna chi at sutaliniadu su NO crispu a ònnia genia de aprofitamentu e su pistighìngiu suo “pro s’afracada a su territòriu sardu chi amegamus de connòschere in custos meses. A fàghere unu sèberu faddidu oe diat pòdere àere cunsighèntzias malas meda pro su tempus benidore”.

“Depimus tènnere is informos giustos pro acumpangiare is determinos in contu de unu tema de importu pro su benidore de s’ìsula”, at atzuntu Sanna. “Bisòngiat de ispiegare e de giustificare su chi amegat de acontèssere e depimus amparare is logos nostros e is interessos de is comunidades chi domandant su respetu de is diritos issoro. Is sìndigos tenent bisòngiu de rispostas cuncretas, is Sardos chi ònnia die espressant su pistighìngiu issoro tenent bisòngiu de rispostas cuncretas. E custas ddas depet frunire sa Regione”.

Custu mangianu, in Aristanis, s’addòbiu cun is sìndigos de sa provìntzia. “Un’àtera ocasione pro meledare e pro si cunfrontare”, narat su sìndigu Sanna, “utilosa pro pintare una lìnia de atzione cumpartzida dae totu is comunidades locales”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.