Novas Aristanesas, chenàbura 20 de cabudanni de su 2024

S’ìndighe de criminalidade prus bassu in Itàlia est in provìntzia de Aristanis – Sa provìntzia de Aristanis est cussa cun s’ìndighe de criminalidade prus bassu in Itàlia segundu “Il Sole 24 Ore”, chi at analizadu ocannu puru is istatìsticas de sa banca de datos interfortzas de su Dipartimentu de Seguresa Pùblica de su Ministeru de s’Internu.

Sa provìntzia de Aristanis tenet su nùmeru prus bassu de denùntzias cunforma a sa populatzione pro violèntzias sessuales (6 denùntzias, est a nàrrere 3,8 ònnia 100.000 abitantes), feridas fatas a s’aposta (71 denùntzias, 45,5 ònnia 100.000 abitantes), dannos (265 denùntzias, 169,8 ònnia 100.000 abitantes), furas (483, 309,5 ònnia 100.000 abitantes) e isderrobatòrios (4 denùntzias, 2,6 ònnia 100.000 abitantes).

Pagas is trampas informàticas, is acontèssidos de trastocu de marcos e produsimentos industriales, is denùntzias pro àteros delitos, is fogos e is assòtzios pro delincuire, aici etotu is ricatos. 

E, ancoras, sa provìntzia de Aristanis est in su de 94 postos pro delitos informàticos, in su de 84 pro usura e in su de 81 postos pro violatzione de sa propiedade intelletuale, in su de 79 postos pro arropaduras e fintzas pro minetzas e in su de 72 postos pro assòtzios de genia mafiosa.

Denùntzia peruna ant presentadu pro mortes preterintentzionales (est in su de 67 postos), bèndidas a martinica (su de 64 postos) e mortòrgios de pipios (su de 62 postos), mentras is denùntzias pro droga sunt istadas 66 (su de 66 postos, 39,7 ònnia 100.000 abitantes) e is mortes colposas 4 (su de 59 postos, 2,6 ònnia 100.000 abitantes).

In fines, si contant 16 denùntzias pro dannu a pustis de fogu e 4 denùntzias pro isfrutamentu de sa prostitutzione e pornografia minorile.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.