Aristanesos nche portant sa Sardigna a Terramanna e peri su mundu – Aristanesos protagonistas in Terramanna e in àteras partes de su mundu in custas dies passadas, pro fainas diferentes.
In “missione” a Perùgia una cambarada de deghessete artesanos, chi ant portadu is atmosferas de is tempos antigos de Sa Paschixedda marrubiesa a sa manifestatzione Umbria Historica, faghende torrare a bìvere su 6 e s’8 de cabudanni una parte de sa vida de Marrùbiu de is Annos Binti e Trinta de su sèculu passadu. “A Perùgia nche amus portadu is artes, is retzetas antigas, is baddos e su presu chi agiomai de bator annos piessignant su regordu istòricu de Paschixedda in Marrùbiu”, at naradu s’assessore comunale de sa Cultura Luca Pompianu.
Dae is regordos istòricos a sa mùsica de is coros. A su Coro La Vega de Milis dd’ant tzacarradu is manos in Ùmbria e, a pustis, in Toscana, in ue at cantadu in duas missas: sa prima in Gùbbio, in sa crèsia de Santu Pedru, tzelebrada dae su prèide de sa bidda de sa provìntzia de Aristanis, don Antonello Angioni. Sa de duas missas, imbetzes, dd’ant cantada in Assisi, in sa basìlica de Santu Frantziscu.
A pustis, su Coro La Vega at tramudadu a Siena: in pratza de su Campu, maistru Gianni Puddu at fatu pònnere a mesu chircu a is cantadores de ddis at fatu cantare Amigos, Serenada e àteros càntigos. A su Coro de Milis dd’at acumpangiadu fintzas sa sìndiga, Monica Ortu.
In fines, faeddamus de sa faina de sa vitze-sìndiga de Bonàrcadu, Stefania Piredda, chi – paris cun àteros tres, unu de Cabuderra, unu de Santu ‘Èngiu e unu de Senorbì – at fatu isbentulare sa bandera de is Bator Moros in is ghiàcios de sa Groenlàndia. Sa pìgiu de a subra de su ghiàciu groenlandesu est su de duos prus mannu in totu su mundu. Dd’at fatu a ischire sa sìndiga de Bonàrcadu, Annalisa Mele: “Seis unu bàntidu pro totus”, at naradu Annalisa Mele in unu messàgiu de norabonas. “Bos torramus gràtzias, ca bos portades in fatu semper sa Sardigna”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
