Novas Aristanesas, mèrcuris 14 de austu de su 2024

Novas Aristanesas, mèrcuris 14 de austu de su 2024

Dae Mesaustu a sa coa de chida: addòbios meda in provìntzia – Dae Mesaustu a sa coa de chida: sunt medas is addòbios chi ant a abbiatzare is meries e is notes de sa provìntzia de Aristanis.

Pro chie non nche cheret passare sa clàssica die in mare, sa Pro Loco de Fordongianus at cuncordadu unu bellu pràngiu de comunidade a sa una, oru oru de su Tirsu. S’at a papare malloreddos a sa campidanesa, porcheddu arrustu, insalada e unu bellu geladu in cumpangia.

In Turre Manna sa protagonista at a èssere sa fide cun is festamentos in onore de Santa Maria Istella Maris: si prevident duas funtziones: una in crèsia, a is 10, e s’àtera in su portu turìsticu, a is 5.45 de merie.

Dae inoghe at a mòvere sa protzessione a mare cun s’icona de Nostra Sennora. Ddoe ant a pigare parte imbarcatziones de pisca e de ispàssiu.

In sa coa de chida faghet a bisitare duas sagras chi oramai si sunt furriadas a èssere una traditzione chi non si podet pèrdere, domìnigu 18 de su mese de austu, e sunt: cudda de Busache, intregada a su sucu, e sa de “Ollasta in Murta”.

S’addòbiu busachesu at a cumentzare cun un’arròliu ghiadu intituladu “Is rugas de su linu” in contu de s’arte de su tessìngiu e, in prus, ddoe at a èssere unu laboratòriu in contu de sa lessia. A merie ddoe est su prus momentu nòdidu chi ddi narant Su Presente, cun is pitzocas chi ant a isfilare peri sa bidda cun canisteddos prenos a cùcuru de pasta de su succu e durches pro onorare a is isposos a friscu, chi ant a fàghere torrare a su tempus de una borta is cojas antigas de sa bidda. Ocannu a is isposos ant a fàghere Ambra Pintore e Roberto Scala. A s’acabbu ddoe at a èssere su sucu de tastare, chi is manos sàbias de is fèminas de sa bidda ant aprontadu.

In Ollasta protagonista at a èssere su licore de murta, fatu pro mèdiu de sa murta arregorta in San Martinu, chi is ollastinus ddi narant “su monti de Ollasta”. A meritzeddu ddoe faghent una chena in pratza Europa cun malloreddos a sa campidanesa, porcheddu arrustu e insalada. S’at a serrare cun guefos a sabore de murta e una bella tassighedda de licore pro ismatire.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.