Novas Aristanesas, martis 27 de austu de su 2024

Novas Aristanesas, martis 27 de austu de su 2024

Sa limba biaita in provìntzia de Aristanis – Amegant de s’ispàrghere fintzas in provìntzia de Aristanis is logos de impestu de sa limba biaita, sa maladia de is animales gramuzadores chi onni annu ponet pistighìngiu mannu in totu s’Ìsula. Is biddas interessadas de prus sunt Ilartzi, Cùglieri, Sèdilo, Bonàrcadu, Paulle, Uras e Marrùbiu.

S’allarme in contu de s’isparghidura de sa maladia dd’at bogadu Coldiretti Sardigna, chi at sinnaladu fintzas is àteras cussòrgias de s’Ìsula interessadas dae custa maladia. Is situatziones prus graves sunt essidas a pìgiu in provìntzia de Casteddu, oru oru de mare. Dae su Sulcis, in ue est essidu a campu su primu impestu, sa maladia at tramudadu a s’Igresiente, a Gùspini e a Arbus, interessende is paris de su Campidanu e lompende fintzas a su Sàrrabus-Gerrei.

Ma sa maladia s’est isparta fintzas in provìntzia de Nùgoro, in ue si sunt iscobertos paritzos logos de impestu in Baronia e in Ogiastra. Sa Gaddura puru est interessada e, in cue, sa maladia pertocat fintzas is bacas. Ma calicuna signalatzione est lòmpida fintzas dae sa provìntzia de Tàtari.

“Non sunt serbidos a nudda is apellos chi aiamus fatu a primìtziu de annu a sa Regione pro chi esseret cuncordadu unu Pranu pro custu istadiale, siat pro is vatzinos, siat pro agiudare a is pastores a comporare is antiparassitàrios. Is Assessorados de s’Agricultura e de sa Sanidade, imbetzes, no ant fatu nudda e semus lòmpidos a custa situatzione”, sutalìniant su presidente e su diretore de Coldiretti Sardigna, Battista Cualbu e Luca Saba. “Ant pèrdidu tempus e giai oe si bient is pèrdidas econòmicas mannas de is siendas. S’ispera est chi is Assessorados regionales de s’Agricultura, de sa Sanidade e de s’Ambiente si faeddent a pare e agatent sa solutzione pro custa situatzione mala chi amegat de fàghere inghenugrare is siendas sardas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.