Novas Aristanesas, mar 20 de austu de su 2024

Novas Aristanesas, mar 20 de austu de su 2024

Sa Regata de is fassonis de Santa Justa – In Santa Justa s’abetat sa Regata de is fassonis de su 2024. At a cumentzare sàbadu 24 de austu, a is chimbe de merie, cun s’addòbiu culturale “Othos” e cun su caminu istòricu-culturale in sa terra de sa pedra crobina, cun s’agiudu de su Parcu Geomineràriu, Istòricu e Ambientale de sa Sardigna, nàschidu gràtzias a is Entes locales chi nde faghent parte. A is ses de merie ant a abèrrere is paradas de sa birra e, a pustis, una nova sa de ocannu, a is ses e mesu ant a fàghere sa “Regata de is cius” a remos. Dae is oto e mesu logu a sa gastronomia, cun sa tastadura de is macarrones cun butàriga, e a sa mùsica, cun s’ispetàculu ètnicu-musicale e baddu sardu cun Ireneo Massidda (cun is sonos) e Giampaolo Piredda (cun su sonetu a matripellas).

Sa die a pustis, domìnigu, sa festa s’abbiatzat: a is 9.30, dae sa pratza de su Comune, ant a mòvere is fassoneris acumpangiados dae is cambaradas cun sa bestimenta de su connotu, mentras a is 10.30 ant a cumentzare is regatas a trivas, chi ant a tirare fintzas a ora de pràndere cun àteras tastaduras, custa borta cun mugheddu e ambidda arrostida. Pro is bisitadores prus curiosos, imbetzes, a is chimbe de merie ddoe est sa prova cun is cius. A meritzeddu, a is oto, ddoe faghent sa Sagra de su mugheddu arrostidu, cun s’esibitzione de sa cambarada folk “Minditzu” de Santa Justa, acumpangiados dae su sonetu de Filippo Cominu e, a pustis, baddu sardu sonadu dae is sonos de Gianfranco Massa.

Sa manifestatzione dda finàntziat su Comune de Santa Justa e dda cuncordant sa Pro Loco, s’assòtziu de “Is fassoneris” e sa Cooperativa de is piscadores de Santa Justa.

Pro cuncordare sa Regata de is fassonis ddoe bolet unu traballu ispantosu: dae unu mese unos 15 pitzocheddos de Santa Justa, de 12 annos in susu, ant fraigadu is fassonis gràtzias a unu cursu cuncordadu dae s’assòtziu de “Is fassoneris”, cun sa punna de sighire cun su connotu de is fassonis, imparende-ddis is tècnicas pro ddos fraigare, ma fintzas pro ispàrghere s’istùdiu de sa cultura de s’istàniu, siat pro su chi pertocat sa pisca, siat in sa carrera de s’ambiente.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.