Novas Aristanesas, lunis 5 de austu de su 2024

Novas dae is cantieris de Aristanis – In Turri Manna s’allònghiant is tempos pro torrare a nou su primu tretu de s’iscaru, pro èssere pretzisos dae Villa Baldino a sa parada Night & Day. Is traballos s’ant a firmare carchi die e ant a torrare a cumentzare a s’acabbu de su mese de austu e a su cumentzu de su mese de cabudanni.

“Amus paradu fronte a unu muntone de chistiones”, ispiegat s’assessore a is Traballos pùblicos Simone Prevete. “Dae su mese de cabudanni, cando is temperaduras s’ant a abbassare, amus a pòdere cumentzare cun sas ghetadas. Is matas non ddas ant a prantare de seguru in istadiale. Ant a èssere is agrònomos a nos nàrrere candu si podet fàghere”.

In su mese de santugaine diant dèpere cumentzare a mòvere sos traballos in un’àteru tretu de s’iscaru, dae sa parada Night & Day finas a sa pratza de sa Turre.

Pro abarrare in allega de traballu, in Aristanis, imbetzes, ddoe at chie si pregontat ite fine apat fatu sa pedra de s’impedradu chi su progetu originale prevedit pro megiorare bia de Ciutadella de Menorca.

A si ddu pregontare sunt una pariga de tzitadinos chi ant fatu notare comente sa faina finale siat diversa dae cudda annuntziada a in antis de su cumentzu de is traballos.

Su progetu tècnicu-econòmicu dd’aiat postu a cùrrere sa Giunta comunale, gràtzias a su proponimentu de s’assessore a is Traballos pùblicos Simone Prevete, in su mese de martzu 2023, e mustradu a is òrganos de informu. In bia de Ciutadella de Menorca aint prevìdidu unu pomentu nou cun lastras de pedra mòlina in is fàscias pedonales e cun is sanpietrinos postos me in is duos oros de una fàscia tzentrale semper in basaltu.

“Su progetu finale non aiat cunsideradu is sanpietrinos”, ispiegat semper s’assessore de is Traballos pùbblicos Simone Prevete, “pro ite ca sa Soprintendèntzia aiat donadu unu parre negativu pro bia Ciutadella de Menorca e pro bia Vitòrio Emanuele II puru, chi dd’ant a istèrrere a sa matessi manera de s’àtera ruga. Is sanpietrinos, imbetzes, ddos ant a pònnere me in is oros de bia de Crispi e de sa bia de su Cramu”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.