Novas Aristanesas, lunis 19 de austu de su 2024

Sa regorta de is firmas pro sa lege “Pratobello” arribat a pratza – In provìntzia de Aristanis puru movet sa regorta de is firmas pro dare fortza a sa proposta de lege de initziativa populare “Pratobello 24” chi, segundu s’art. 3 de s’Istatutu sardu chi pertocat s’Urbanìstica e su Paesàgiu, diat permìtere a sa Regione de firmare is cantieris eòlicos chi is traballos sunt giai cumentzados.

Sa faina pertocat s’opositzione a su progetu pro su cuncordu de s’impiantu eòlicu offshore “Mistral” a pìgiu de abba intra de Cabu Marràrgiu e Cabu Mannu, a Nord de sa penìsula de su Sinis, in dae in antis de Turre de su Putzu, Santa Caderina, S’Architu e Bosa. Su progetu previdet su cuncordu de 32 aerogeneradores artos 355 metros a subra de su livellu de su mare, a prus de 19 mìllias nàuticas dae sa costera (35 chilòmetros), cun una potèntzia de 480 MW in totu e de 15 MW pro ònnia aerogeneradore.

In Aristanis s’at a pòdere firmare in is mesas cuncordadas dae tzitadinos voluntàrios in is zonas prus frecuentadas. Podent firmare is residentes in tzitade o in is biddas de acanta. Non podet firmare chie at giai firmadu in su Comune suo de residèntzia e chie non tenet sa residèntzia in Aristanis e in is biddas acanta. Serbit a portare in fatu sa carta de identidade.

Intra de is chi sunt espònnidos a manera crara, ddoe est s’assòtziu culturale Liberanimos, chi cun palas eòlicas insambenadas ant manifestadu su 3 de austu in Turre Manna etotu, e s’assòtziu ecologista “Grupu de Interventu giurìdicu (GrIG), chi at bogadu sa petitzione contras de s’aprofitamentu energèticu, mandende is osservatziones suas pro su protzedimentu de valutatzione de impatu ambientale pro su progetu “Mistral”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.