Novas Aristanesas, chenàbura 9 de austu de su 2024

Novas Aristanesas, chenàbura 9 de austu de su 2024

Topolino e sos Gigantes de Mont’’e Prama – Sos Gigantes de Mont’’e Prama nch’imbatent a su giornaleddu caraterìsticu Topolino Magazine 3585 e si faghent protagonistas de unu contu, ambientadu in Sardigna, chi nde narat sas orìgines misteriosas.

Dae mèrcuris, su fumetu si podet agatare in totu sas edìculas sardas: s’aventura noa l’at iscrita Bruno Enna cun sos disignos de Luca Usai. In prus, pro festare s’editzione de Topolino dedicada a sos Gigantes, sa Fundatzione Mont’’e Prama at detzìdidu de aprontare un’eventu mannu, in cabudanni, chi at a pònnere in parte iscolas meda de su territòriu.

“Semus cuntentos meda chi su contu a fumetos de Topolino ammentet sos Gigantes de Mont’’e Prama”, narat su presidente Anthony Muroni. “Una de sas punnas de importu de sa Fundatzione est pròpiu sa de pònnere in parte sa comunidade, màssimu sos giòvanos, semper pro fàghere de ghia in su caminu importante de connoschèntzia chi, gràtzias a sos contos a fumetos, abarrat imprèmidu a manera positiva in sa mente de sos prus piticos, e non de issos ebbia: tantos mannos portant ancora in su coro cussas pàginas de paperi chi si leghiant a fitianu”.

S’idea s’agiunghet a sas tantas chi ant distintu custu annu ricu meda de fainas pro sa Fundatzione a 50 annos dae cando aiant agatadu sos Gigantes, postos in evidèntzia finas in s’espositzione noa, chi abbàidat a cara a Mont’’e Prama.

Su fumetu de Topolino cun sos Gigantes protagonistas est una publicatzione foras de s’ordinàriu pro totu sa comunidade de su territòriu de su Sinis e finas un’ocasione in prus pro fàghere a connòschere a manera ispassiosa s’istòria de Mont’’e Prama, ponende in parte non sos prus piticos ebbia, chi s’ant a fàghere protagonistas issos puru leghende su misteru de sos Gigantes, ma imbatende finas a tantos mannos ancoras amantiosos de su fumetu famadu chi ant lèghidu a pitzinnos e chi ant sighidu a lèghere fintzas a mannos.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.