Novas Aristanesas, chenàbura 23 de austu de su 2024

Novas Aristanesas, chenàbura 23 de austu de su 2024

S’istàtua de Nostra Sennora de Terraba torrat a domo – Terraba e totu sa comunidade, in fines, ant pòdidu torrare a imprassare s’istàtua de Nostra Sennora, chi nde-dd’aiant furada in su mese de ghennàrgiu e chi dd’ant torrada a agatare is Carabineris.

S’istàtua de Nostra Sennora de Bonària dd’ant torrada a manera ufitziale mèrcuris a mangianu, cun una tzerimònia cuncordada a s’aposta. A is fideles si dd’ant torrada is Carabineris in sa Missa manna de is 11.30 in sa crèsia de Santu Pedru Apòstolu de Terraba.

In custos ùrtimos meses, a pustis chi dd’ant acontzada, s’istàtua – chi tirat 60 tzentìmetros de artària – fata dae s’artista Dina Pala e donada a sa Comunidade dae una famìllia de fideles, est torrada duncas a su nìciu suo.

Sa fura dd’aiant fata su note de su 19 de ghennàrgiu: s’istàtua nde dd’aiant furada dae su nìciu suo chi, intra de is àteras cosas, fiat una tapa – dae su 1964 a oe – in su caminu de sa prufessone chi faghent in Marceddì.

Fiant istados unos cantos tzitadinos chi, passende, si-nde fiant acatados chi su nìciu de sa bia chi portat a Marceddì fiat bòidu: prus a fine, aiant segadu su bidru e s’istàtua de Nostra Sennora fiat isparèssida. Sa nova de custa fura sacrìlega aiat fatu inchietare a gente meda in Terraba e no isceti, prus che totu a is piscadores.

Luegos fiant mòvidos is iscrucullos e is subralogos de is Carabineris de Terraba, agiudados dae su repartu iscruculladore de sa Cumpangia de Aristanis, pro regòllere totu is informos chi aerent pòdidu permìtere de iscobèrrere a is furuncos.

S’istàtua, a pustis, dd’aiant torrada a agatare su 26 de ghennàrgiu, ma fiat segada in sete cantigheddos. Custos cantigheddos ddos aiant torrados a s’artista chi aiat fatu s’istàtua e chi nd’at contivigiadu, duncas, s’acontzu.

Oe in die is Carabineris amegant de iscrucullare ancoras, pro iscobèrrere a is furuncos responsàbiles de custa faina mala.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.