Novas Aristanesas, chenàbura 2 de austu de su 2024

Su testamentu biològicu in provìntzia de Aristanis – No est andende bene meda in provìntzia de Aristanis chi, paris cun sa provìntzia de Nùgoro, est in is ùrtimos postos in sa classìfica chi pertocat su testamentu biològicu. Segundu is datos elaborados dae s’Osservatòriu DAT de s’assòtziu “Luca Coscioni”, in su 2023 sa provìntzia de Aristanis at mustradu unu DAT (Disponimentu Antitzipadu de Tratamentu) ònnia 321 bividores. Unu nùmeru bassu meda, si si pensat chi Pescara, sa provìntzia prus virtudosa in Itàlia, contat 1 DAT ònnia 90 bividores.

In su 2023 in s’Ìsula s’est connota una crèschida de su 69,9% de DAT noos depositados cunforma a ocannu passadu, mustrende un’interessu e unu livellu de cuscièntzia semper prus mannos intra de is tzitadinos. 

In provìntzia de Aristanis, is Comunes chi ant trasmìtidu is informos sunt istados 63 e, in custas biddas, sunt 355 is DAT chi ant depositadu cun una populatzione magiorenne de 114.002 tzitadinos in totu. De custos DAT, 326 ddos ant carrigados in sa banca de is datos.

Intra de is biddas prus virtudosas ddoe sunt Siamajore, cun 16 DAT depositados cun una populatzione de 786 magiorennes, est a nàrrere 49 bividores pro ònnia Disponimentu Antitzipadu de Tratamentu. Sighint Siapicia cun 5 DAT cun 301 bividores magiorennes (unu DAT ònnia 60 bividores) e Siris cun 2 DAT depositados cun 197 bividores magiorennes (99 bividores pro ònnia DAT).

Datos negativos in Ilartzi, cun 2 DAT isceti cun 3638 tzitadinos magiorennes ( unu DAT ònnia 1819 bividores) e Arborea cun su pròpiu nùmeru de DAT depositados, cun una populatzione de 3245 magiorennes (1623 bividores pro ònnia DAT).

In su cabu-logu, imbetzes, in su 2023 ant depositadu 91 DAT (cun 26871 residentes magiorennes), est a nàrrere unu DAT ònnia 295 bividores.

Su DAT si podet fàghere in maneras diferentes: o su tzitadinu dd’iscriet a manos suas etotu, o imperende su modellu chi si-nde podet iscarrigare dae sa pàgina de s’assòtziu “Luca Coscioni”. Su modellu si podet mudare a tenore de is bisòngios de onniunu. Is DAT faghet a ddos annoare, mudare o revocare in cale si siat momentu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.