Novas Aristanesas, mèrcuris 3 de trìulas de su 2024

Unu manuale cun sas istrutziones pro parare fronte a sas bèndidas a baratu – In prus de sas dies in mare e de sos seros in suta de sos isteddos, b’at un’àteru apuntamentu chi essit a campu a nou onni istiu: s’incomintzu de sas bèndidas a baratu.

Ocannu sa Sardigna at detzìdidu de s’uniformare a sas àteras regiones italianas, fissende sa data de incomintzu pro su 6 de trìulas, est a nàrrere pro sàbadu chi benit. L’ant detzìdidu, su 18 de làmpadas passadu, s’assessore pro su Turismu, Artesanadu e Cummèrtziu Franco Cuccureddu, sos rapresentantes de sos assòtzios de su cummèrtziu e de sos consumadores e, in rapresentàntzia de sos Comunes sardos, sa presidente de su Cussìgiu de sas Autonomias locales Paola Secci.

Finas in provìntzia de Aristanis s’ant a pòdere fàghere afàrios pro sa bellesa de sessanta dies. Tocat però a dare atentu, ammentende bene unu vademecum de valore cumpiladu dae Altroconsumo.

In antis de totu tocat de detzìdere cun tempus su chi bisòngiat, averiguende in s’armàdiu e girende in sas butegas in sas dies in antis de comintzare sas bèndidas a baratu: custu at a agiuare a non comporare cosa chi non serbit, e sena de bi pensare bene. In prus, pro su chi atenet a sa roba de bestire, sa roba bèndida a baratu devet èssere de s’istajone currente.

Tocat a si medire semper sa roba pro non tènnere sorpresas pagu agradèssidas una borta torrados a domo: sa roba bèndida a baratu bortas meda non si podet cambiare, duncas est mègius a èssere seguros de su chi si còmporat. Sa garantzia balet finas pro sa roba bèndida a baratu, duncas est mègius a custoire s’iscontrinu.

Mègius a istare atentos meda a sas etichetas de sos prètzios: sos butegheris devent espònnere cantu costaiat su produtu in sas 30 dies in antis de sa bèndida e su prètziu iscontadu. Si si tenet carchi duda de comente at imbaratadu, est semper mègius a domandare informos a sos butegheris, chi sunt ligados a su prètziu espostu e sunt obligados a lu rispetare in su momentu de su pagamentu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.