Novas Aristanesas, mèrcuris 10 de trìulas de su 2024

Traballare in sas cussòrgias de monte – Tempos de biàgiu chi non si podent atzetare e pagu reconnoschimentu in sa produtividade: sa mancàntzia de servìtzios iscartat dae su traballu sas impresas e sos territòrios sardos de monte. Lu narat unu documentu de s’Ufìtziu Istùdios de Confartigianato Imprese Sardegna. Pro sas 3.600 impresas sardas de sos 34 comunes montanos (su 9% de su totale), cun sos 7.500 traballadores issoro e cun 53mìgia abitantes (3,4% de sos sardos) e unu balàngiu de prus de 650milliones de èuros, est grae chi sos servìtzios siant comente sunt, e custa est sa diferèntzia prus manna contra a sas àreas de pranu, de montigru e de costera.

Analizende s’organizatzione e s’andamentu de sas impresas artesanas in sos comunes de monte e in sas àreas internas, essit a campu chi chie benit dae unu comune de monte bi ponet prus o mancu 44 minutos, est a nàrrere 24 minutos in prus (+123%), contra a sos 19 chi bi ponet chie benit dae unu comune chi no est de monte, pro imbàtere a s’intrada de super-istradas, istatziones de trenos, portos e aeroportos prus a curtzu. Custu pesat finas in su balàngiu individuale; s’Ìsula tenet su balàngiu prus bassu pro traballadore a livellu natzionale: 27.306 èuros chi currispondet a una diferèntzia de su -23% contra a sos ocupados chi bivent in logos chi non sunt de monte.

“Custos datos nos ammentant, in craru, comente sos logos  internos sunt logos dèbiles, a tesu dae sos nùcleos printzipales in ue sunt sos servìtzios primàrios, in ue però b’at bona chedda de gente”, at cummentadu Giacomo Meloni, presidente de Confartigianato Imprese Sardegna.

Sos datos però mustrant chi, nointames sas dificultades, atividades produtivas meda creent in s’isvilupu de sos logos de monte e de sos territòrios internos. Pro Confartigianato Imprese Sardegna duncas tocat a tènnere unu progetu de crèschida chi traballet e pòngiat dinari in sas àreas internas chi sunt arrischende de s’isbagantare e chi fatzat de sas impresas su coro de s’isvilupu e de sa produtzione de traballu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.