Novas Aristanesas, martis 30 de trìulas de su 2024

Crònacas dae is prajas de sa provìntzia de Aristanis – Lòmpidos a metade de istadiale, sunt medas is novas chi arribant dae is prajas de sa provìntzia de Aristanis.

Cumentzamus dae is prajas de Santeru, in ue si torrat a connòschere sa gherra de is ombrellones, prantados in sa praja serrados pro lassare su logu a is meres. In agiunta, in prus, ddoe sunt isdràios e cadireddas de praja chi faghent crèschere sa chèscia intra de chie diat chèrrere su logu semper disponìbile e chie imbetzes, arribadu a sa praja, si diat chèrrere gosare una die de mare sena de dèpere fàghere tretos mannos pro agatare unu postu.

Abarrende in is prajas de Santeru, in is dies passadas s’est pesada sa chistione de una caminera fata in sa praja de Sa Roca Tunda: s’iscaleri in s’acabbu e su fatu chi est curtza no permitint a is disàbiles de lòmpere a s’abba. Ddoe ant agiuntu, duncas, una rampighedda. Is residentes puru ant sutaliniadu su problema de su fatu chi est tropu curtza.

Un’àteru problema sinnaladu pertocat is machineddas pro su pagamentu de is parchègios, chi pigant isceti dinari in cuntante. Chie bolet pagare cun sa carta nde depet iscarrigare un’aplicatzione in su telefoneddu.

Ma fintzas is machineddas de is prajas crabarissas nd’ant fatu pesare una chèscia: in Maimoni sa tropu basca at iscallentadu sa machinedda, chi funtzionat prus a bellu, e duncas is bagnantes ant dèpidu isetare 20 minutos a suta de su sole pro pòdere pagare su parchègiu.

In Turre Manna, imbetzes, su Comune de Aristanis at detzìdidu de abèrrere sa gherra contras de is sigaretas: gràtzias a un’ordinàntzia de su sìndigu Massimiliano Sanna, fintzas a su 31 de santugaine at a èssere proibidu a fumare in is prajas e in s’opinedu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.