Novas Aristanesas, martis 23 de trìulas de su 2024

Sos comitados de bighinadu – Sighende s’esempru de Terraba, finas Aristanis retzit un’interpellàntzia apretosa presentada dae totu sos cussigeris comunales de minoria pro pedire a su Comune de fundare sos comitados de bighinadu, fratzione e borgada. Su primu chi at firmadu est su capu-grupu de Oristano più, Efisio Sanna.

Sa costitutzione de sos comitados de bighinadu l’aiant inserida s’atòngiu passadu in mesu de sos obietivos de mandadu inditados in su Dup 2024-2026. Si su Cunsìgiu comunale l’aeret aprovada, sa proposta diat impignare su sìndigu Massimiliano Sanna e sa Giunta pro chi “de acordu cun sos printzìpios inditados dae su Tuel e cun sos indiritzos de partetzipatzione e de acordu istabilèssidos dae s’istatutu comunale, andet a in antis – in sas formas permìtidas – a istituire sos comitados de bighinadu, fratzione e borgada, dende mandadu a sa cunferèntzia de sos capos de grupu e/o a sa Cummissione chi tenet cumpetèntzia pro incarrerare su tema, partzire sos territòrios e istèrrere su regulamentu chi bi cheret”.

In su 2023, in abrile, in s’àula de su Cunsìgiu de su Comune de Terraba si sunt fatas sas votatziones e su comitadu diretivu de bighinadu l’ant votadu duos bighinados ebbia: Asilu e Domus Beccias, imbetzes Maceddì devet isetare sas àteras votatziones. Ùnicu bighinadu chi est resurtadu a votare su comitadu suo in sas ùrtimas votatziones de su 2021, Asilu at torradu a votare a presidente a Maria Graziella Corrias, paris cun Ornella Concu, Giampaolo Diana, Graziella Pau e Piero Vacca. Unu postu in su comitadu si l’ant gherradu ses candidados. Imbetzes pro su bighinadu Domus Beccias sunt intrados totu sos chimbe terrabesos candidados, ghiados dae su presidente nou Giuliano Usai.

In Marceddì imbetzes nudda de fàghere: mancari sa borgada esseret tentu 13 candidados, tres ebbia de custos ant retzidu votos, ma sos comitados cherent de chimbe membros.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.