Novas Aristanesas, martis 2 de trìulas de su 2024

Sos campaniles de s’Artzidiòtzesi – Dae su tempus antigu sas medidas ant ammajadu semper sos òmines, chi si preguntaiat cale diat èssere su frùmene prus longu o su monte prus artu. Finas in s’Artzidiòtzesi de Aristanis ant chèrridu fàghere craresa subra de una pregunta chi gente meda si faghiat: cale est su campanile prus artu?

Gasi s’Ufìtziu Pastorale de su Turismu, Tempus lìberu e Isport at detzìdidu de comintzare a medire bene sas tres turres campanàrias prus artas, est a nàrrere sa de sa Sea de Aristanis e de sas crèsias de Busache, Ortueri e Santeru.

Si unu tempus sos datos chi si regolliant fiant leados dae s’esperièntzia pràtica, sa tecnologia at agiuadu su còmpitu, impreende una fotogrammetria digitale. Pro mesu de una sèrie de fotografias tiradas dae unu drone, s’est pòdidu creare unu modellu tridimensionale de sos campaniles e si sunt pòdidas fàghere sas medidas.

Sos datos regortos sunt istados divididos in duas categorias de resurtados: in sa prima s’artària de sa turre cun sa rughe e in sa segunda cussa sena sìmbulu.

Sos resurtados ant duncas bogadu a campu unu cambiamentu in su chi sa gente creiat: a s’imbesse de su chi s’est tramandadu, no est su campanile de Santeru su prus artu, ma su de sa Sea de Aristanis.

Sas medidas sunt custas: sa Sea est sa prus arta cun 41,23 metros sena rughe e 44,23 metros cun sa rughe. Sa segunda est sa crèsia de Busache cun 40,62 metros sena rughe e 41,42 metros cun sa rughe. Santeru nche dat in su de tres postos cun 38,27 metros chi imbatent a 39,57 cun sa rughe, imbetzes sa medàllia de linna l’at retzida su campanile de Ortueri artu 37,43 metros e cun sa rughe 38,63.

“Naramus chi Busache est sa bidda chi tenet su campanile prus artu, mancari sa fama de su campanile de Santeru de seguru non benit denegada” at cummentadu su promovidore de s’istùdiu don Innàtziu Serra.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.