Novas Aristanesas, lunis 8 de trìulas de su 2024

Su sarvamentu in mare in provìntzia de Aristanis – In sas prajas de sa provìntzia de Aristanis comintzat su servìtziu de sarvamentu in mare. In sa marina de Narabuia, in Is Arenas, sos bagninos bi sunt su sàbadu e sa domìniga dae sas 9 a sas 19, pro totu sas coas de chida finas a metade de mese, a pustis ogni die dae su 16 de trìulas.

In Turre Manna, imbetzes, sunt tres sas postatziones de sos bagninos prevididas dae su comune de Aristanis, finas a su 31 de austu. In su Sinis b’ant a èssere tres turritas, ognuna cun duos bagninos in sas prajas de Santu Giuanne de Sinis, Is Arutas e Mari Ermi. Su servìtziu, forsis, at a èssere ativadu dae s’ùrtima coa de chida de trìulas.

Sos bagninos ant a arribare fintzas a sa marina de Cùglieri: su comune at a ativare giai pro totu sos meses de trìulas e de austu duas postatziones, una in Santa Caterina de Pitinnuri e s’àtera in Is Arenas, mentres non bi nd’at a àere in S’Architu ca non b’at bagninos. S’est pensende de ativare – pro duas chidas in austu – una cunventzione cun sos vìgiles de su fogu cun gommone o moto de abba, in Santa Caterina de Pitinnuri.

In Magumadas s’at a ativare una postatzione a s’acabu de sa localidade  Noèsala mentres in Tresnuraghes est ancora in cursu sa gara pro su sarvamentu in mare: pro como una postatzione ebbia, in sa praja de Porto Alabe cun su bagninu presente in trìulas e in austu. 

In Bosa su servìtziu est partidu dae sa prima die de trìulas finas a su 30 de cabudanni in sas prajas de Turas e S’Abba Durche mentres in Bosa Marina b’ant a èssere sos bagninos de sos istabilimentos balneares.

Dae sa segunda coa de chida de trìulas, b’ant a èssere sos bagninos su sàbadu e sa domìniga – dae sas 9 a sas 20 – in Putzu Idu, Sa Mesa Longa e Sa Roca Tunda, in sa marina de Santeru. In austu, imbetzes, ogni die.

In Abarossa, in territòriu de Santa Justa, sos bagninos b’ant a èssere dae su 19 de trìulas a su 17 de austu, dae sas 9 a sas 19, mentres in Arborea su servìtziu diat dèpere partire dae su 14 de trìulas cun una turrita e tres bagninos. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.