Novas Aristanesas, lunis 22 de trìulas de su 2024

Traballos in sos pontes de su Tirsu e de Marceddì – Dae lunis passadu, pro neghe de àteras giunturas de cambiare, su ponte nou de su Tirsu pro sa essida a Nord dae Aristanis est torra serradu pro una bindighina de dies. Sa serradura de su tràficu, sa prima die, est comintzada a pustis de sas 9 e su tràficu dae carrera Tirsu l’ant deviadu – comente si previdiat – a sa lìnia esterna andende a Silì ma, a pustis de pagos minutos, b’at istadu un’arribimentu chi at firmadu su tràficu, màssimu pro more de sos mezos pesantes.

Finas a su 29 de trìulas mancu sos mezos cun massa chi sobrat sas 3 tonnelladas e mesu a càrrigu prenu chi benint dae sa parte de Aristanis-Silì (carrera Vandalino Casu – carrera Natzionale) podent passare in sa lìnia esterna de Silì. Pro como, in una parte de una de sas duas corsias de su ponte nou non faghet a bi passare.

Su ponte dd’aiant serradu finas s’ierru passadu pro carchi chida, semper pro cambiare sas giunturas de islargadura. In istiu però est prus infadosu màssimu pro chie fiat andende a mare, chi forsis non connoschiat s’ordinàntzia de sa Provìntzia.

Gente meda sa prima die chi su ponte fiat serradu est dèvida passare in sa lìnia esterna pro andare a sa 131 e imbàtere a su Remèdiu, o torrare a intro de Aristanis e passare dae su ponte de Brabau. In prus b’at istadu un’intzidente in su ponte de Brabau, chi at firmadu su tràficu a su puntu chi s’assessore comunale Ivano Cuccu at dèvidu iscrìere a su prefetu pro agatare una solutzione.

Novas bonas, imbetzes, pro su ponte de Marceddì: pro lu torrare a abèrrere mancat unu passàgiu burocràticu isceti. Acabbada sa prima parte de sos traballos, s’at a pòdere torrare a passare e sos ghiadores ant a pòdere passare in seguresa gràtzias a s’impiantu nou de semàforos chi amegant de ddu collaudare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.