Novas Aristanesas, lunis 15 de trìulas de su 2024

Sa provìntzia de Aristanis bolat a Parigi pro sas Olimpìades – Semus andende a cara a sas Olimpìades de Parigi, unu de sos addòbios isportivos prus isetados a in ue bi partètzipant sos mègius atletas de su mundu in sas disciplinas issoro. Sa de 33 editziones at a comintzare dae inoghe a duas chidas o pagu prus, chenàbura 26 de trìulas, cun sa tzerimònia de inauguratzione, e at a durare finas a s’11 de austu. S’Itàlia partètzipat cun 40 atletas, unu record istòricu. Intre custos b’ant a èssere finas bator isportivos de sa provìntzia de Aristanis.

B’at a èssere su curridore de velotzidade Lorenzo Patta, 24 annos, inseridu in s’elencu de sos atletas italianos cunvocados pro sas Olimpìades dae su diretore tècnicu de s’iscuadra de atlètica de agilidade, Antonio La Torre. Cun sa stafeta, Patta at bìnchidu sa medàllia de oro olìmpica in Tokyo, in su 2021, sa medàllia de prata in sos Mundiales de Budapest, in su 2023, e sa medàllia de oro europeu in Roma, su mese de làmpadas coladu.

In Frantza, sa provìntzia de Aristanis at a èssere rapresentada finas in sa pallavolo feminile: intre sas protagonistas b’at a èssere finas sa pallavolista de Narabuìa, Alessia Orro, 25 annos. Sa capitana de s’Itàlia at a èssere Anna Danesi.

Cun Orro, 25 annos, ant cunvocadu finas sas cumpàngias de club Paola Egonu e Myriam Sylla.

Prontu a pigare a s’aparèchiu olìmpicu finas su vogadore de Aristanis, Stefano Oppo, 29 annos, chi tres annos a como in Giapone aiat bìnchidu sa medàllia de brunzu in su dòpiu pro pesos lèbios imbetzes ocannu nd’at batidu a domo sa Copa de su Mundu, paris cun Gabriel Soares.

In ùrtimu, in sa pedana de sos Giogos, finas s’atleta e artziadore de pesos Sergio Massidda, 22 annos, de Ilartzi, at a èssere impignadu in sa categoria 61 chilos. Sa de Parigi est sa prima Olimpìade sua, a pustis de sas medàllias in sos Europeos e in sos Mundiales.

Su 9 de trìulas coladu si sunt fatas sas cunvocatziones ufitziales de atlètica e de pallavolo, sa die a pustis in Roma b’est istada sa tzerimònia de presentada de sos grupos chi ant a partetzipare a sos Giogos Olìmpicos.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.