Novas Aristanesas, giòbia 18 de trìulas de su 2024

Basca meda in provìntzia de Aristanis: temperaduras subra de 35 grados – Cumentzat una simana de basca meda in provìntzia de Aristanis puru. Difatis amegat de arribare a Sardigna un’antitziclone africanu ispantosu, chi at a imprassare mesu Europa. In s’ìsula nostra puru si previdet un’undada noa de fògora chi nche at a fàghere artziare sa colunnedda de mercùriu a subra de 35 grados.

S’abetant temperaduras de 38° grados in Fordongianus e in Uras, is biddas prus bascosas de sa provìntzia, segundu is previsiones de 3B Mèteu.

In Aristanis sa colunnedda de mercùriu s’at a firmare a 36°, aici etotu comente in àteros logos meda de su territòriu provintziale.

Sa de ses undadas de basca de custa istajone est andende in custas oras cara a s’Itàlia, a pustis chi nd’at piscadu sa Penìsula ibèrica cun 45/46° in s’umbra, comente narat ilMeteo.it.

Est unu antitziclone chi at a ingendrare basca meda fintzas in is artàrias mannas de monte.

In Itàlia, s’at a istentare pro una simana chi, si andat bene, diat pòdere durare fintzas a metade de chida chi benit, ma est capatzu chi sa fògora manna potzat abarrare pro totu su mese de trìulas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.