Novas Aristanesas, chenàbura 5 de trìulas de su 2024

Sa Provìntzia faghet 50 annos – Sa Provìntzia de Aristanis s’est aprontende a festare sos primos 50 annos dae sa nàschida sua. Fiat su 16 de trìulas de su 1974 cando, pregonende sa lege 306, su presidente de sa Repùblica Giovanni Leone at istituidu sa Provìntzia de Aristanis.

S’anniversàriu de importu s’at a festare duncas cun una sèrie de eventos promòvidos dae s’Ente matessi, guvernadu dae s’amministradore istraordinàriu Massimo Torrente. Unos cantos de custos s’ant a fàghere finas paris cun s’amministratzione comunale de Aristanis.

Sas primas initziativas pensadas pro onorare custu anniversàriu importante s’ant a fàghere pròpiu dae su 16 de trìulas ma bi nd’at in programma finas a su 31 de nadale.

S’at a comintzare cun s’inauguratzione de una mustra fotogràfica in Palatzu d’Arcais, programmada pro su 16 de trìulas.

Pro s’ocasione s’at a pònnere in mustra finas sa Fiat 132 cun targa OR 000001 e s’at a torrare a imprentare su primu nùmeru de su periòdicu “Oristano – 95^a Provincia italiana”. In prus, s’at a fàghere finas unu bullu filatèlicu ispetziale.

In programma b’at finas unu cunvegnu, intituladu “Sa Provìntzia comente fiat, comente est, comente at a èssere” e s’at a fàghere unu cuncursu pro tesis de làurea chi apant faeddadu de temas chi pertocant su territòriu de sa provìntzia de Aristanis.

Finas sa Cisl cheret festare su traguardu de s’Ente: lunis chi benit in Turre Manna s’at a fàghere su cunvegnu-dibàtidu “50 annos de Provìntzia – Unu caminu comintzadu e unu benidore de fraigare – Sas propostas de sa Cisl”, in ue ant a intervènnere rapresentantes de su mundu polìticu e de su sindacadu, pro faeddare de sos isetos de su territòriu torrende a ammentare s’istòria sua. At a faeddare finas su segretàriu natzionale cunfederale Ignazio Ganga, in prus de su segretàriu generale de sa Cisl Sardigna Pier Luigi Ledda.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.