Novas Aristanesas, chenàbura 19 de trìulas de su 2024

Vitòrias isportivas meda in zona de Aristanis – Sos traguardos isportivos a in ue sunt imbàtidos sos giòvanos de sa zona de Aristanis sunt meda. Imbàtidos a pagu tretu dae sa medàllia, sas pitzocas e sos pitzocos de s’Artist Project de Aristanis nche sunt torrados a domo cuntentos dae sos mundiales de dantza chi si sunt fatos in Praga dae su 27 de làmpadas a su 6 de trìulas colados. Nche sunt torrados a domo cun su de 4 postos a sa ballerina Emma Canu e finas cun su de 9 postos semper a issa e in ùrtimu cun su de 13 postos a sas dischentes Nora Cabras e Lucrezia Fais in prus de sa Canu. Sos 26 dischentes de s’iscola de Caterina Urru si l’ant gherrada cun tècnica e onore mannu in rapresentàntzia de s’Itàlia in paritzas categorias de show dance, dae su clàssicu a su hip hop, dae su cantu a sa dantza.

Cuntentesa manna finas pro su ballerinu aristanesu Pietro Grossi, 13 annos, intradu in s’importante Iscola de Teatru in sa Scala de Milanu. In su 2022 semper in Milanu, Grossi – chi at frecuentadu s’Iscola Milène de Aristanis – aiat passadu sa seletzione pro intrare in s’Acadèmia ucraina de ballu e dantza clàssica.

In ùrtimu benint duas medàllias de oro pro sos atletas de sa Masa Fitness Club in sos Campionados italianos de categoria de dantza paralìmpica Fidesm in Rìmini. Marta Concas est imbàtida prima in s’ispetzialidade solo show dance dce, e paris cun Matteo Steri in su duo show dance dce.

Non mancat sa cuntentesa finas in s’isport: una medàllia de oro, una de prata e duas de brunzu pro sas atletas de su Tzìrculu Nàuticu Aristanis impignadas su fine de chida passadu in su segundu eventu de su percursu Canoagiovani in Campolattaro, in provìntzia de Benevento, acumpangiadas dae su presidente de su Tzìrculu Nàuticu Aristanis Gian Parco Patta e dae su tècnicu Angelo Casu. A pustis, mèrcuris passadu, 17 de trìulas, sa canoista de su Tzìrculu Nàuticu Aristanis Elena Murtas est imbàtida a su de chimbe tempos in sos Mundiales Junior chi si faghent in Plovdiv, in Bulgaria, in sas baterias de K4 500 metros feminile.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.