Novas Aristanesas, chenàbura 12 de trìulas de su 2024

Sos assòtzios animalistas contras de s’Àrdia – “Bastat pàlios, bastat torneos, bastat giostras impreende sos caddos in pistas chi non sunt adatas”. Custu est s’apellu de s’Oipa a pustis de sa bochidura de duos caddos de s’Àrdia chi sàbadu passadu ant fatu una ruta fea meda in s’Àrdia de Sèdilo. 

S’Organizatzione internatzionale protetzione animales at a andare a in antis in fatis cun una domanda de bìere sos atos a pustis de sa bochidura de sos duos caddos. 

Non solu, in sa chistione est interbènnidu fintzas s’assòtziu Horse Angels, chi a peus de àere annuntziadu un’espostu dae inoghe a pagas dies a sa Procura de sa Repùbblica, pagas oras in antis de s’Àrdia pro Santu Antine, aiat denuntziadu sos perìgulos collegados a s’eventu, denuntziende “chi non fiant istados respetados sos rechisidos mìnimos pro sa seguresa” comente unu “fundu adatu e divisores pretzisos ma comente si siat pagos pro sa seguresa e su rispetu pro caddos e persones”.

A pustis de sa nova mala de sa morte de sos duos caddos e de àere ischidu chi fintzas una deghina de caddos sunt pro como suta osservatzione a pustis de sos intzidentes de sàbadu, s’Oipa domandat in una nota chi “manifestatziones comente custa siant superadas in nùmene de una tziviltade ètica e giurìdica prus manna, e fintzas in su rispetu de s’artìculu 9 nou de sa Costitutzione, chi amparat fintzas sos animales. In custa rievocatzione sos cadderis current in unu percursu rìpidu e arruinadu, a una velotzidade de tìmere, faghende arriscare sa vida a sos caddos. Est tempus de nche pònnere in su sufitu usàntzias betzas comente custa una borta pro totu”. 

In fines, semper segundu s’Oipa, fintzas su Pàliu de Siena e àteros eventos assimigiantes sunt perigulosos ca “torneos fora de tempus chi non tenent prus motivu de b’èssere in un’època in ue creschet e si afòrtigat una sensibilidade, sustènnida fintzas dae sos orientamentos giurìdicos e giurisprudentziales chi non cheret usos e abusos subra sos animales”. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.