Novas Aristanesas, mèrcuris 12 de làmpadas de su 2024

Novas Aristanesas, mèrcuris 12 de làmpadas de su 2024

Is fainas pro pipios e pitzocheddos de sa Diòtzesi de Abas e Terraba – In sa Diòtzesi de Abas e Terraba in custas dies at a mòvere una faina bella: is pipios e is pitzocheddos ant a pòdere gosare de su servìtziu de istentu. Ddu cuncordat sa Caritas de sa Diòtzesi. Su progetu faghet parte de unu programma prus mannu intituladu “Incura-ti-nde de”, chi previdet fainas de agiudu in sa carrera sòtziu-educadora e chi est finantziadu dae sa Caritas Italiana cun su dinari de s’8 X Milli a sa Crèsia Catòlica e dae sa Fundatzione de Sardigna. A su servìtziu ddi narant “Unu passu in dae in antis”. Dd’ant a pòdere sighire is pipios e is pitzocheddos de totu is biddas de sa Diòtzesi de Abas e Terraba. Is seas in ue s’ant a fàghere is fainas sunt tres.

In Terraba is fainas si faghent in s’oratòriu parrochiale, in pratza de Santu Triagus. In Sàrdara is fainas ddas faghent in s’oratòriu de Santu Tarcìsiu. In fines su progetu dd’ant a incarrerare in Abas, in su Tzentru pro sa Famìllia “Santu Giusepe”.

“Est unu momentu de importu pro is pipios e pro is pitzocheddos, un’ocasione in prus chi tenent pro sotzializare, pro imparare cosas noas”, narat in unu documentu su diretore de sa Caritas de sa Diòtzesi de Abas e Terraba, prèide Marco Statzu. “Cun custas fainas faghet a ddis ghetare una manu de agiudu in s’isvilupu issoro, a costàgiu de is famìllias. Semus cumbintos chi movende dae s’agiudu a chie est in dificultade si potzat fraigare una sotziedade prus giusta e si potzat reconnòschere sa dignidade de sa persone”.

Su coordinadore de su progetu Davide Curreli at regordadu, imbetzes, s’esperièntzia bella giai fata ocannu passadu in àteras fainas cuncordadas in su territòriu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.