Novas Aristanesas, martis 11 de làmpadas de su 2024
Is Eletziones amministrativas in Provìntzia de Aristanis – Comente in is àteras provìntzias de Sardigna, in provìntzia de Aristanis puru in is dies de sàbadu 8 e domìnigu 9 de làmpadas is eletores de unas cantas biddas ant votadu, a prus pro s’eletzione de is cumponentes de su Parlamentu europeu, fintzas pro s’eletzione de is sìndigos e de is consìgios comunales noos.
Is comunes interessados dae is Eletziones amministrativas fiant Bosa, Magumadas, Sini e Sorradile.
In Bosa su sìndigu nou est su consigieri regionale e rapresentante de su Partidu Sardu de Atzione Alfonso Marras, 47 annos, chi at bintu a is duos aversàrios chi teniat: su presidente de s’Òrdine de is ingennieris de sa provìntzia de Nùgoro Giuseppe Ibba, 62 annos, e Alessandro Campus, 49 annos, abogadu, chi fiat giai istadu amministradore comunale in is annos passados. Marras ghiaiat sa lista “Bosa mudat”, mentras Ibba “Bosa, nois bi semus” e Campus “Bosa mudat Bosa”.
In Magumadas at bintu Angelo Masia, carabineri in pensione, 58 annos, chi ghiaiat sa lista “Torramus-nos a leare Magumadas”. Masia at propassadu a s’aversàriu suo, Emanuele Cauli, 51 annos, ex sìndigu de sa bidda.
In Sini sa fasca a tres colores dd’at conchistada Andrea Carracoi, chi tenet fintzas su primadu de èssere su sìndigu prus giòvanu de sa provìntzia, pro ite ca tenet 29 annos. Carracoi, consigieri comunale in s’ùrtima legisladura, ghiaiat sa lista “Bive Sini” e at bintu a s’aversàriu Elio Simbula, 70 annos, ex ispetore capu de sa Politzia de Istadu, cun sa lista “Paris pro Sini”.
In fines, in Sorradile su sìndigu nou est s’ex agente de cummèrtziu in pensione Giampaolo Loi, 67 annos, cun sa lista sua “Sorradile. Una comunidade chi bivet!”. S’aversàriu fiat Massimo Zaru, militare de s’Esèrtzitu e peritu informàticu, 46 annos, chi ghiaiat sa lista “Aunidos pro Sorradile”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
